प्यूठान, एक पालिका एक हुलाक अभियान अनुसार प्यूठानको माण्डवी गाउँपालिका–३ जस्पुरमा हुलाक कार्यालय स्थापना गरिएको छ । मङ्गलवार माण्डवी गाउँपालिकाका अध्यक्ष नमराज अधिकारीले हुलाक कार्यालयको साइनबोर्ड खोलेर उद्घाटन गरेका हुन् ।

गौरव बोकेको हुलाकलाई सरकारी डाँक सेवामा सहजता पुग्ने विश्वास व्यक्त गरे । ‘हुलाक कुरियर सेवामा गई आधुनिकीकरण गर्न सामना गर्ने चुनौती छ, त्यस तर्फ पालिका हुलाकले सेवा प्रवाहमा ध्यान देओस् ’ अधिकारीले भने ।

सरकारले लिएको नीति अनुसार सोमबार स्वर्गद्वारी नगरपालिका र मङ्गलवार माण्डवी गाउँपालिकामा कार्यालयको स्थापना गरिएको जिल्ला हुलाक कार्यालय प्यूठानका प्रमुख लाल बहादुर वलीले जानकारी दिए । वलीले जिल्लाका सबै पालिकामा हुलाक कार्यालय स्थापना गर्ने बताए ।

उनका अनुसार ९ स्थानीय तह रहेको प्यूठानका ८ वटा पालिकामा पालिका हुलाक र एक पालिकामा जिल्ला हुलाकले नै हेर्ने गरी ९ वटा हुलाक कार्यालय हुनेछन् । मल्लरानी गाउँपालिकामा जिल्ला हुलाक कार्यालय मार्फत सेवा प्रवाह हुनेछ भने अन्य पालिकामा पालिका हुलाकको स्थापना गरिनेछ । जिल्लामा पुराना इलाका हुलाक कार्यालय मार्फत हुलाक सेवा दिइँदै आइएको थियो । ती हुलाकलाई सरकारले खारेज गरेसँगै अव पालिका हुलाकबाट हुलाक सेवा प्रवाह हुनेछन् । सरकारले गत आव देखिनै ‘एक पालिका एक हुलाक’को अवधारणा कार्यान्वयनमा ल्याएको थियो ।