प्यूठान नगरपालिकाका प्रमुख प्रशासकीय अधिकृत नारायण प्रसाद भण्डारीले अत्यावश्यक कामका खर्चमा समेत बेरुजु आउँदा स्थानीय तहले हैरानी खेप्नु परेको बताएका छन् ।

सोमबार झुलेनी युनाईटेड नेटवर्कको विशेष संवादमा कार्यक्रममा भण्डारीले शिक्षा र स्वास्थ्य जस्ता संविधानले स्थानीय तहलाई अधिकार दिएको विषयमा गरेको खर्चलाई बेरुजु लेखिदिँदा समस्या खेप्नु परेको बताएका हुन् ।

‘शिक्षा र स्वास्थ्य जस्ता संवेदनशील क्षेत्रको सुधारका कामहरू समेत बेरुजुमा उल्लेख हुँदै आएको छ । तर यी क्षेत्रहरूमा बजेट खर्च नगरी नहुने हुन्छ’ प्रमुख प्रशासकीय अधिकृत भण्डारीले भने । नगरपालिकाले करारमा झन्डै १ सय जना शिक्षक र स्वास्थ्य संस्थामा कार्यरत कर्मचारीलाई दिएको तलब, चाडबाड खर्च, भत्ताहरू बेरुजु लेखिएको उनले बताए । भण्डारीले प्यूठान नगरपालिकाले बेरुजुलाई प्रत्येक वर्ष नदोहोर्‍याउन आवश्यक पहल गर्दै भण्डारीले बताए ।

आर्थिक वर्ष २०८०/०८१ को महालेखा परीक्षणको प्रारम्भिक प्रतिवेदनबाट देखिएका असुल गर्नुपर्ने बेरुजुको सन्दर्भमा असुलीको लागि पत्राचार समेत गरिएको जानकारी दिए ।