प्युठानको सरुमारानी गाउँपालिकामा आँखा उपचार केन्द्र स्थापना गरिएको छ । तिलगंगा आँखा प्रतिष्ठानको साझेदारीमा आँखाका रोगीहरूलाई लक्षित गरेर  केन्द्र स्थापना गरिएको पालिकाले जनाएको हो ।

बुधवार पालिका उपाध्यक्ष बसन्ता खड्काले औपचारिक रूपमा आँखा उपचार केन्द्रको उद्घाटन गरेकी हुन् । उनले नजिकै उपचार केन्द्र  सञ्चालन भएपछि आँखाको जाँच गराउन बेलाबेलामा जान र सुविधा उपभोग गर्न पालिकावासीलाई अनुरोध गरिन् ।  सरुमारानी –२ मा स्थापना गरिएको केन्द्रमा पालिकाका ६ वटै वडा, माण्डवी र ऐरावती गाउँपालिका तथा  अर्घाखाँचीको शितगंगा नगरपालिका क्षेत्रका आँखाको समस्या भएका बिरामी लाभान्वित हुनेछन् ।

आँखा उपचार केन्द्र सञ्चालनसँगै सरुमारानी गाउँपालिका बासीलाई दाङ तथा बिजुवार पुग्नु पर्ने बाध्यता हटेको छ । पालिकाले वर्षमा एक पटक शिविर सञ्चालन गर्दा कुर्ने न्यून आयमा नागरिकले अव सहजै सेवा लिन पाउने भएका छन् । टाढा गएर उपचार गराउन आर्थिक अवस्थाले नभ्याउने भएकाले नागरिकको स्वास्थ्य उपचारका लागि पालिकामै आँखा उपचार केन्द्र सञ्चालन गरेको उपाध्यक्ष खड्काको भनाई छ ।