झिमरुक गाउँपालिका–८ दिहाल्ना चौरमा बुधवार द्वादशी मेला सम्पन्न भएको छ । मेलामा ३ सराय र १२ भैलो समूहले कला प्रदर्शन गरेको हुन् ।

दिहाल्ना चौरमा प्रत्येक वर्ष तिहार पछि द्वादशी तिथिमा मेला लाग्ने गर्दछ । २०५४ सालमा स्थानीयको पहलमा सराय र भैलोका संरक्षण सँगै रमाइलोको लागि सुरुवात गरिएको कार्यक्रम २०७४ साल देखि झिमरुक गाउँपालिका वडा नं. ८ ले सञ्चालन गर्दै आएको वडा अध्यक्ष तुलस बस्नेतले जानकारी दिए ।  झिमरुक, गौमुखी र नौबहिनी गाउँपालिकाको सीमा क्षेत्रमा पर्ने दिहाल्नामा झिमरुक गाउँपालिका ८, नौबहिनी गाउँपालिकाको ४ खवाङ र ६ लुङका युवाहरूले सराय प्रदर्शन गरेका थिए ।

मेलामा भैलो समेत प्रदर्शनी गरिएको हो । नौबहिनी, झिमरुक र गौमुखी गाउँपालिकाका १२ भैलो समूहले भैलो प्रदर्शन गरेका थिए । मेलामा सहभागी समूहलाई ७ हजारका दरले यातायात खर्च वडा कार्यालयले प्रदान गरेको थियो । कार्यक्रममा नौबहिनी गाउँपालिकाका अध्यक्ष डिल बहादुर थापा, उपाध्यक्ष बिष्णा थापा, गाैमुखी गाउँपालिका उपाध्यक्ष महावीर राना, प्रमुख जिल्ला अधिकारी रमा आचार्य सुवेदी लगायतको उपस्थिति थियो ।