घरबास नभएपछि प्यूठानकी ३२ वर्षीय रिता बुढामगर सार्वजनिक स्थलमा श्रीमानको किरिया बसेकी छिन् । मङ्गलवार श्रीमान् उज्वल बुढामगरको मृत्यु भएपछि उनी प्यूठान नगरपालिका ३ स्थित सापडाँडा स्वास्थ्य चौकीको निर्माणाधीन टहरामा किरिया बसेकी हुन् ।

ड्राइभर पेसा गर्ने उज्वलको मङ्गलवार ट्रकमा बसेकै समयमा एक्कासि बेहोस भई मृत्यु भएको थियो । ८ वर्षअघि विवाह गरेका उनीहरूका ६ वर्षीय छोरी र २ वर्षीय छोरा छन् । गौमुखी गाउँपालिका वडा नं. २ अर्खा घर बताउने उज्वलले रितालाई बिहेपछि गाउँमा समेत नलगेको रिताले बताईन । उनीहरूको परिवार कोठा भाडामा बस्दै आएको थियो ।

घरधनीले मृत्यु संस्कार आफ्नो घरमा गर्न नदिने भनेपछि रिताले सार्वजनिक स्थलमा श्रीमानको किरिया बसेकी हुन् । श्रीमानको मृत्युपछि अन्तिम संस्कार गर्ने ठाउँ नभएपछि स्वास्थ्य चौकीको निर्माणाधीन टहरामा व्यवस्था मिलाइएको प्यूठान नगरपालिका वडा नं. ३ का वडा अध्यक्ष सुमनराज श्रेष्ठले बताए ।

परिवारमा आम्दानी गर्ने मुख्य व्यक्तिको मृत्यु भएपछि रिताको परिवार सङ्कटमा परेको छ । उनका बालबच्चाको भविष्यको लागि स्थानीयले सहयोगको अपिल गरेका छन् । प्यूठान नगरपालिका–४ बिजुवारकी सावित्रा श्रेष्ठले बालबच्चाको भविष्य बिग्रन नदिन सबैले सहयोग गर्नुपर्ने बताइन् ।

प्यूठान नगरपालिकाका प्रवक्ता समेत रहेका वडा अध्यक्ष श्रेष्ठले रिताको परिवारलाई सहयोगका लागि सहयोगदाताहरू खोजिरहेको बताए । ‘उहाँहरू प्यूठान नगरपालिकाको हुनुहुन्न तर पनि हामीले दैनिकी निर्वाहको लागि समस्याको समाधान खोजिरहेका छौँ’ श्रेष्ठले भने ।