२०८१ मङ्सिर १५विवादास्पद मेडिकल व्यवसायी दुर्गा प्रसाईंले प्रधानमन्त्री केपी शर्मा ओलीविरुद्ध आक्षेप लगाउने गरी ‘प्रमाण’ सार्वजनिक गर्दा गल्ती भएको बयान दिएका छन् ।
साइबर ब्यूरोका एक अधिकृतका अनुसार, सरकारी वकिलको रोहबरमा भएको बयानका क्रममा प्रसाईंले ह्वाट्सएपमा आएको कागज प्रमाणीकरण नगरी बाहिर ल्याउनु कमजोरी भएको स्वीकार गरेका हुन् ।
प्रसाईंले ३ मंसिरमा युट्युबरहरू बोलाएर प्रधानमन्त्री केपी शर्मा ओलीको कम्बोडियास्थित स्मार्ट एक्जिअटा कम्पनीमा लगानी रहेको दाबी गरेका थिए । आफ्नो दाबीलाई पुष्टि गर्न उनले प्रमाण भन्दै एउटा कागज सार्वजनिक गरेका थिए ।
प्रहरीको प्रारम्भिक जाँचमा नै त्यो कागज फर्जी रहेको भेटिएपछि ४ मंसिरमा प्रसाईं भक्तपुरस्थित निवासबाटै पक्राउ परेका थिए । उनले सार्वजनिक गरेको कागज र भनाईलाई कतिपय अनलाईन र युटुवले प्राथमिकता दिएर प्रशारण गरेका थिए।
भ्रमपूर्ण समाचार र सामाग्री प्रकाशन तथा प्रशारण गर्ने सञ्चारमाध्यमलाई प्रेस काउन्सिलले पनि कारवाहि गरेको थियो। काउन्सिलले तथ्य प्रमाण विना भ्रमपूर्ण सामाग्री सार्वजनिक गर्ने प्रेस काउन्सिलमा सूचीकरण भएका अनलाईन सञ्चारमाध्यम र युटुव च्यानललाई स्पस्टिकरण सोध्ने र निर्देशन दिने गरेको छ भने, सूचीकरण नभएकाको हकमा कारवाहिका लागि साईवर ब्यूरोमा पत्राचार गरेको छ।
काउन्सिलले पछिल्लो समय तथ्य प्रमाण बिनाका फेक समाचार फैलाउनेहरुमाथि निगरानि र कारवाहि बढाउँदै लगेको छ।
हाम्रा सामाग्रीहरू झुलेनी युनाइटेड नेटवर्क प्रा.ली. द्वारा सञ्चालित निम्न सञ्चारमाध्यममा हेर्न, पढ्न र सुन्न सकिन्छ ।
