२०८१ पौष ४नेपाल पत्रकार महासङ्घ, प्यूठानका नवनिर्वाचित पदाधिकारीहरूले पदभार ग्रहण गरेका छन् । बिहीबार एक कार्यक्रमका बिच पदभार ग्रहणसँगै नयाँ कार्यसमितिले आफ्नो जिम्मेवारी सम्हालेको हो ।
मङ्सिर २८ गते सम्पन्न अधिवेशनबाट निर्वाचित कार्यसमितिलाई महासङ्घ प्यूठान शाखाका पूर्व अध्यक्षहरू गिरु प्रसाद भण्डारी, सुशील पोख्रेल र निवर्तमान अध्यक्ष सञ्जय रिजालले बधाई ज्ञापन गरेका थिए । पदभार ग्रहणका क्रममा निवर्तमान कार्यसमितिका पदाधिकारीहरूले आफूसँग रहेका जिम्मेवारी र सामाग्रीहरू नवनिर्वाचित पदाधिकारीलाई हस्तान्तरण गरेका हुन् ।
कार्यक्रममा बोल्दै महासङ्घ, प्यूठानका पूर्व अध्यक्ष गिरु प्रसाद भण्डारीले पत्रकार महासङ्घको गरिमा बढाउने गरी काम गर्न आग्रह गरे । महासङ्घ साझा बनाउँदा र चुनावी प्रक्रियाबाट नेतृत्व चयन गर्दा फरक पर्ने हुँदा साझा नेतृत्वले साझा मुद्धाहरुलाई उठाउँदै मिडिया र श्रमजीवीहरूको पक्षमा काम गर्न सुझाव दिए ।
पूर्व अध्यक्ष सुशील पोख्रेलले मिडिया व्यवस्थापनको लागि पत्रकार महासङ्घले आवश्यक समन्वय गर्नेमा विश्वास व्यक्त गरे ।
नवनिर्वाचित अध्यक्ष श्रीराम भण्डारीले सबैको समन्वय र सहकार्यमा अघि बढ्ने प्रतिबद्धता व्यक्त गरे ।
हाम्रा सामाग्रीहरू झुलेनी युनाइटेड नेटवर्क प्रा.ली. द्वारा सञ्चालित निम्न सञ्चारमाध्यममा हेर्न, पढ्न र सुन्न सकिन्छ ।
