नेकपा मसालका महामन्त्री मोहन विक्रम सिंहले सङ्घीयता खारेज गर्नका लागि संविधान संशोधन गर्नुपर्ने बताएका छन् ।

संविधान संशोधनको मुद्दा बहसमा आइरहेका बेला महामन्त्री सिंहले सङ्घीयता खारेजीका लागि संविधान संशोधन गर्नुपर्ने पक्षमा मसाल रहेको बताए ।

बिहीबार नेपाल कम्युनिस्ट पार्टी मसाल जिल्ला समिति प्यूठानले आयोजना गरेको पत्रकार भेटघाट कार्यक्रममा आफ्ना बिचारहरू राख्दै महामन्त्री सिंहले सङ्घीयता मुलुकको हितमा नरहेको दोहोर्‍याए । उक्त पार्टीले आगामी चैत्र २४ गतेदेखि ३० गतेसम्म सङ्घीयता विरोधी आन्दोलनलाई राजधानी केन्द्रित गर्ने भएको छ । पार्टीको चुनावी मोर्चा राष्ट्रिय जनमोर्चा मार्फत सङ्घीयता खारेजीको माग गर्दै आन्दोलनलाई राजधानी केन्द्रित गर्न थालिएको पार्टीका महामन्त्री मोहन विक्रम सिंहले बताए ।

धर्म निरपेक्षताको पक्ष र सङ्घीयताको विरुद्धमा सालले आन्दोलन गर्न थालेको उनको भनाई छ ।  सिंहले देश टुक्राउने र जातीय तथा क्षेत्रीय विखण्डन ल्याउने सङ्घीयता नेपालीको एजेन्डा नभएको दाबी गरे ।

पार्टी जिल्ला प्रवक्ता राम पहाडीको अध्यक्षतामा भएको पत्रकार भेटघाट कार्यक्रममा राष्ट्रिय जनमोर्चा लुम्बिनी प्रदेशका अध्यक्ष बोमबहादुर खत्री, लगायत नेताहरूको उपस्थिति रहेको थियो । कार्यक्रमको सञ्चालन जिल्ला अध्यक्ष ज्ञामुराम न्यौपानेले गरेका थिए ।