झिमरुक गाउँपालिकाले एकल जीवनयापन गरिरहेका महिलालाई  भत्ता दिने भएको छ । सङ्घीय सरकारको एकल महिला सामाजिक सुरक्षाको सुविधा नपाएका तर, जीविकोपार्जनमा असहजता भएका महिलालाई लक्षित गरेर यो कार्यक्रम ल्याइएको झिमरुक गाउँपालिकाका अध्यक्ष पित बहादुर महतरा क्षेत्रीले बताए ।

सङ्घीय सरकारले श्रीमानको मृत्यु भएका सबै उमेरका महिला र ६० वर्ष उमेर पुगेका अविवाहित महिलालाई एकल महिला भत्ता दिँदै आएको छ । झिमरुक गाउँपालिकाले १२ वर्षदेखि श्रीमान् बेपत्ता भई एक्लै बसेका र ४५ वर्ष उमेर पुगेका महिला, श्रीमानसँग सम्बन्ध विच्छेद गरी एकल जीवनयापन गरिरहेका र राज्यबाट सेवा सुविधा पाउने गरी आम्दानीको श्रोत नभएका ४५ वर्ष उमेर पुगेका महिला र ४५ वर्षको उमेर पुगेका तर, अविवाहित रहेका महिलालाई भत्ता वितरण गर्न लागेको गाउँपालिका अध्यक्ष महतराले बताए ।

सङ्घीय सरकार अन्तरगतका सामाजिक सुरक्षाका कार्यक्रममा समावेश नभएका र कार्यविधिभित्र पर्ने एकल जीवनयापन गरिरहेका महिलालाई भत्ता दिने गरी कार्यक्रम कार्यान्वयन थालिएको झिमरुक गाउँपालिकाका प्रमुख प्रशासकीय अधिकृत कृष्ण बहादुर थापाले बताए । थापाका अनुसार मासिक १ हजार रुपैयाँका दरले भत्ता उपलब्ध गराइने छ । भत्ताका साथै सीपमूलक तालिम र  स्वरोजगार मूलक कार्यक्रममार्फत एकल जीवनयापन गरिरहेका महिलालाई आयआर्जनमा जोडने विकल्पबारे छलफल भइरहेको थापाले बताए । पुष मसान्तसम्म ४५ वर्ष उमेर पुगेका महिला यो कार्यक्रममा सहभागी हुन सक्नेछन् । 

गाउँपालिकाले भत्ता दिने निर्णय गरेपछि आर्थिक अभावमा जीवनयापन असहज भएका लक्षित समूहका महिला लाभान्वित हुने भएका छन् ।