तिहारमा भैलो खेलेर जम्मा भएको रकमले सडकबत्ती जोडेपछि प्यूठान नगरपालिका वडा नं. २ स्थित पशुपतिनगर टोल झिलिमिली बनेको छ ।

भैलो खेलेर जम्मा भएको ५७ हजार र टोलवासीमार्फत उठेको ४१ हजार सहयोग गरी ९८ हजार लागतमा सडकबत्ती जडान गरिएको टोल सुधार समितिका अध्यक्ष मुक्ति प्रसाद शर्माले बताए ।

समितिको पहलकदमीमा १ हजार ८० मिटर विद्युतीय तार र टोलका लागि २५ वटा सडक बत्ती खरिद गरेर जडान गरेपछि पशुपतिनगर टोल झिलिमिली भएको छ । टोल सुधार समितिमार्फत हरेक महिना बैठक बसी ५० रुपैयाँका सामाजिक कामका लागि सङ्कलन गर्ने गरिएको अध्यक्ष शर्माले बताए । स्थानीय तहमा सडकबत्ती जडानको माग गर्दा बजेट नभएको बताएपछि टोलकै प्रयासमा जोडिएको उनको भनाई छ । ९३ घरधुरी रहेको टोलमा  सडकबत्ती जडान भएपछि स्थानीय खुसी भएका छन् ।