२०८१ माघ १६सहिद स्मृति पार्कमा सहिदको सम्मानमा कार्यक्रम गरी सहिद दिवस मनाइएको छ । प्यूठान नगरपालिका वडा नं. ७ गाजुरीमा रहेको सहिद स्मृति पार्क व्यवस्थापन समितिको आयोजनामा कार्यक्रम गरिएको हो ।
कार्यक्रममा बोल्दै प्रमुख अतिथि एवं प्रतिनिधि सभा सदस्य सूर्य बहादुर थापा क्षेत्रीले राणा शासनको विरुद्धको आन्दोलनमा मृत्युदण्ड दिइएका चार सहिद सँगै देशभरबाट बलिदानी दिने सहिदहरूप्रति श्रद्धाञ्जली व्यक्त गर्दै सहिदको त्याग र बलिदानप्रति सबैले सम्मान गर्नुपर्ने बताए ।
सहिद स्मृति पार्कले सहिदको सम्मान, सम्झना र पर्यटकीय गन्तव्यको रूपमा विकास हुँदै आत्मनिर्भरतातर्फ अगाडि बढ्ने बताए । पार्कलाई मित्रमणि आचार्य, टङ्कप्रसाद आचार्य, कृष्ण सेन इच्छुक, उमेशचन्द्र थापा लगायत जिल्ला र देशभरबाट बलिदानी दिने सहिदहरूलाई सम्झन र सम्मान गर्न उचित स्थलको रूपमा विकास गर्न अगाडि बढ्नुपर्ने थापाको भनाई थियो ।
प्रदेशसभा सदस्य तुलसीराम शर्माले राजनीतिक हिसाबले सहिदको बलिदानी को जगमा भएको परिवर्तन संस्थागत गरेर जाने कुरामा एकताबद्ध हुनुपर्ने बताए ।
प्यूठान नगरपालिकाका मेयर विष्णु बहादुर योगीले सहिद स्मृति पार्कको पूर्वाधार निर्माणका लागि सबैसँग सहकार्य गर्ने बताए ।
कार्यक्रमका अध्यक्ष ज्ञामुराम न्यौपानेले सहिदहरूले व्यक्तिगत आकाङ्क्षा सोच्दै नसोची देश र व्यवस्थाका निम्ति आफ्नो बलिदानी दिने सहितको कर्मबाट त्याग र समर्पणको पाठ सिक्नुपर्ने बताए ।
कार्यक्रममा जनप्रतिनिधि, कर्मचारी, सुरक्षा निकायका प्रतिनिधि लगायतको उपस्थिति रहेको थियो ।
हाम्रा सामाग्रीहरू झुलेनी युनाइटेड नेटवर्क प्रा.ली. द्वारा सञ्चालित निम्न सञ्चारमाध्यममा हेर्न, पढ्न र सुन्न सकिन्छ ।
