प्यूठान आयुर्वेद स्वास्थ्य केन्द्रको आयोजनामा प्यूठान नगरपालिका ३ बाल मन्दिरमा आयोजित निःशुल्क स्वास्थ्य शिविरमा ९३ जनाले स्वास्थ्य परीक्षण गराएका छन् । केन्द्रको ‘मानसिक स्वास्थ्य प्रवर्द्धनका लागि योग ध्यान कार्यक्रम’ अन्तरगत आयोजित शिविरमा मधुमेह, रक्तचाप, पिसाबको जाँच, उचाइ अनुसार तौलको अवस्था लगायतका विषयमा जाँच गरिएको थियो ।

जाँच गराएकाहरू मध्य १८ जनामा उच्च रक्तचाप, ४६ जनामा उचाइ अनुसारको तौल बढी, ११ जनामा मधुमेहको समस्या देखिएको छ । स्वास्थ्य परीक्षण कार्यक्रममा योगबारे पनि जानकारी गराइएको थियो । योगबारे जानकारी दिँदै स्वास्थ्य केन्द्रका डाक्टर तारा पोख्रेलले मन र आत्माको मिलन भन्नु नै योग रहेको बताइन । पछिल्लो समय नसर्ने रोगबाट पीडित हुने दर बढी रहेको र योग साधनाले यसको रोकथामको लागी सहयोग पुग्ने बताइन । त्यस्तै विस्तारित आयुर्वेद सेवा केन्द्र बाल मन्दिर योग समितिका अध्यक्ष भगवती विष्टले  मानिस शारीरिक र मानसिक रूपमा स्वस्थ रहनको लागी शरीरमा रहेका नकारात्मक गुणहरूलाई त्याग्न आवश्यक रहेका बताइन ।

आयुर्वेद स्वास्थ्य केन्द्रले जिल्लाको क्वाडि बाल मन्दिर र जिल्ला समन्वय समिति खलङ्गाबाट नियमित रूपमा योग अभ्यास र मानसिक स्वास्थ्यका लागि सकारात्मक सोचका कक्षाहरू सञ्चालन गरिरहेको केन्द्रका कविराज निरीक्षक टुक बहादुर रोकाले बताए ।

स्वास्थ्य केन्द्रका निमित्त प्रमुख शिशिर पोख्रेलको अध्यक्षतामा भएको कार्यक्रमको सञ्चालन विस्तारित आयुर्वेद सेवा केन्द्र विजुवारका प्रमुख थानेश्वर न्यौपानेले गरेको थिए ।