आज नयाँ वर्ष । यस वर्षको नयाँ दिन । यसको रौनकले जताततै छपक्कै छाएको छ । नयाँ वर्षको अवसर पारेर धेरै जना घुम्न निस्केका छन् । धेरैका घरमा नयाँ परिकार पाकेका छन् । पाक्दै छन् । नयाँ कपडा किनेका छन् । सामाजिक सञ्जालहरू शुभकामनाले रङ्गिएका छन् ।

५६ बि सी बाट भारतका राजा विक्रम आदित्यले विक्रम संवत् सुरु गरेका हुन । नेपालमा यस पात्रोको प्रयोग आधिकारिक रूपमा चन्द्र शमशेरको पालादेखि सुरु भयो । त्यसभन्दा पहिले नेपालमा शंक स‌ंवत् प्रयोग हुन्थ्यो । शंक संवत् १२३ देखि आधिकारिक प्रयोगबाट हटाइपछि १९५८औँ सालमा नेपालको आधिकारिक पात्रो बन्यो । राजा विक्रम आदित्यले चलाएको संवत् आज वैशाख १ गतेका दिन २०८२ औँ वर्षको बुढो भएको छ । यसलाई हामी नयाँ वर्षको रूपमा मनाउँदै छौँ। विक्रम संवत् सँगै धेरै जनाले आफ्नो उमेर गन्दागन्दै औसत आयु पार गरी जीवनको अन्त भयो । आजको दिन कतिको लागि पहिलो नयाँ वर्ष होला । कतिको लागि शताब्दी पुरुषको रूपमा नयाँ वर्ष ।

आज धेरै नेपालीले घरघरमा नयाँ तिथि मितिको पात्रो भित्र्याएका छन् । नयाँ वर्षमा बितेको वर्षको समीक्षा गर्दै आउँदा दिनलाई अपेक्षाकृत सफल तुल्याउने प्रतिबद्धता व्यक्त गर्नुपर्छ । नयाँ  योजना बनाउने दिनको रूपमा लिनुपर्छ । नयाँ वर्षको दिन नयाँ कामको थालनी गर्ने । नयाँ अठोट गर्ने । वर्षभर कार्यान्वयन गरेर चैत्र मसान्तमा समीक्षा गर्नु पर्छ । यसो गरे व्यक्ति, संस्था वा सरकारले नयाँ वर्ष मनाएको उपलब्धि हुन्छ ।

बिदा भएको २०८१ र प्रारम्भ भएको २०८२ बिचको फरक पनि स्वयंको प्रतिबद्धता र सुधारसँग जोड्नु पर्छ । त्यसैले नयाँ वर्षको आगमन व्यक्ति, संस्था वा सरकार स्वयं उत्प्रेरित र उद्देश्य उन्मुख बनाउने कुरामा जोड्नुपर्छ । क्यालेन्डरको पाना पल्टाउने प्राविधिक विषयमा मात्रै सीमित गर्नु हुँदैन । सबै सबैमा २०८२ का हरेक दिन आफ्नो प्रतिबद्धता पछ्याउने, अघिल्लो वर्षको  कमजोरी सुधार गर्ने प्रेरणा मिलोस नयाँ वर्ष २०८२ को शुभकामना !