शिक्षकहरूको आन्दोलनका कारण सरकारी विद्यालयको गतिविधि ठप्प हुँदा निजी विद्यालयले भने धमाधम भर्ना अभियान सञ्चालन गरिरहेका छन् । सरकारी विद्यालयका कर्मचारी र शिक्षकहरू १४ दिनदेखि आन्दोलनमा हुँदा निजी विद्यालयमा धमाधम भर्ना अभियान चलिरहेको हो ।

नेपाल शिक्षक महासङ्घको आह्वानमा चैत्र २० गतेदेखि देशभरका शिक्षकहरू आन्दोलनरत छन् । तत्काल शिक्षा ऐन जारी हुनुपर्ने शिक्षकहरूको माग छ । सरकारले वार्तामा बोलाउँदा समेत शिक्षकहरू वार्ता बस्न मानेका छैनन् ।

संसद्को हिउँदे अधिवेशन अन्त्य भइसकेको छ । यो अवस्थामा उनीहरूको माग पुरा गर्न अध्यादेश, विशेष अधिवेशन वा छिटै वर्षे अधिवेशन बोलाउनुपर्ने हुन्छ ।

आन्दोलन थप चर्काउने गरी शिक्षक महासङ्घले सबै शिक्षकलाई आन्दोलन र हडतालमा सहभागी हुन आह्वान गरेको छ । यस कारण नयाँ वर्षसँगै सुरु हुने भर्ना अभियान प्रभावित बनेको छ । तत्काल शिक्षकको आन्दोलन नरोकिए ११ गतेदेखि सुरु हुने १२ कक्षाको परीक्षा समेत प्रभावित हुने देखिन्छ । हडतालका कारण एसइई का उत्तर पुस्तिका जाँच पनि प्रभावित वनेको छ ।

निजी विद्यालयले धमाधम भर्ना र पठनपाठन सुरु गर्दा सरकारी विद्यालय सुनसान छन् । यसले सरकारी विद्यालयमा विद्यार्थी सङ्ख्या घटन सक्ने सम्भावना बढाएको छ ।