प्यूठान प्रवेश गर्ने मुख्य सडक भालुबाङ–प्यूठान सडकमा सवारी चाप बढे पनि  डबल लेन गर्ने काम अझै सुरु भएको छैन ।

प्यूठान सदरमुकाम खलङ्गा सम्मको सडकलाई दुई लेन बनाउने योजना अघि सारिएको वर्षौ भए पनि कार्यान्वयन नभएकाले दुर्घटनाको जोखिम अझै कायमै छ । बारम्बार दुर्घटना हुने क्षेत्रमा पर्ने घुम्टी समेत फराकिलो बनाउने काम नभएको सवारी चालक गुनासो गर्छन् ।

दाङको भालुबाङ देखि प्यूठानको चकचकेसम्म ४५ किलोमिटर सडक क्षेत्र  साँघुरो र अप्ठ्यारो छ । यही क्षेत्रमै बारम्बार दुर्घटना हुने गरेको प्रहरीको तथ्याङ्कले देखाउँछ । यस्तै दाखाक्वाडी बिजुवार क्षेत्रमा सडक साँघुरो भएर दैनिक सवारी जाम लाग्ने गर्छ ।

सडक साँघुरो र अप्ठ्यारो भएका कारण माण्डबी गाउँपालिका १ तिरामको गर्जेनीमा २०६१ माघ ८ गते दाङबाट प्यूठान टारी आउने जन्ती बस दुर्घटना भएको थियो ।  त्यो घटनामा दुलहा सहित ४१ जनाको घटनास्थलमै ज्यान गएको थियो । त्यस पछि यो सडकमा दर्जनौँ पटक दुर्घटना भएका छन् । सयौँ जनाले ज्यान गुमाएका छन् । गर्जेनी दुर्घटनाले सिङ्गो मुलुकको ध्यानाकर्षण गराएको थियो । तत्कालीन प्रधानमन्त्री शेरबहादुर देउवाले शोक वक्तव्य समेत निकालेका थिए । अझै पनि गर्जेनी घटनाले झस्किन्छन् प्यूठानी ।

साबिकको जिल्ला विकास समिति प्यूठानले सात सदस्यीय स्वतन्त्र नागरिक छानबिन समिति गठन गरेको थियो । ‘हामीले धेरै दुःख गरेर गर्जेनी दुर्घटनाको कारणसहित प्रतिवेदन तयार पारेका थियौँ,’ जिल्ला विकास समिति बनाएको छानबिन समितिका संयोजक रामेश्वर सुवेदीले भने, ‘तर कतैबाट पनि सुझाव कार्यान्वयन भएन । गर्जेनी दुर्घटना भएको  दुई दशक बित्दा पनि सडकको अवस्था उस्तै रहेको सुबेदीको भनाइ छ । साँघुरो सडकका कारण दुर्घटना भएको उ बेला बनाइएको प्रतिवेदनको निष्कर्ष रहेको सुबेदीले बताए ।

सडकमा यस वर्ष आवधिक मर्मत शीर्षक अन्तर्गत काम भइरहेको छ । तर दुई लेनको लागि  बजेट आएको छैन । कार्यालयले गरेको अध्ययनअनुसार डबल लेनको सडक निर्माण गर्नको लागि झन्डै १ अर्ब बजेट आवश्यक पर्छ । दुई जिल्ला प्रवेश गर्ने यो सडकमा दैनिक तीन हजार भन्दा बढी सवारी ओहोर–दोहोर गर्छन् ।  उपभोग्य वस्तु यही खण्ड भएर दुई जिल्लाको लागि भित्रन्छ । ‘सडकको अप्ठ्यारो खण्डको केही भागमा घुम्टी कटीङ गरेर चौडाइ बढाउने काम भइरहेका छन्,’ सडक डिभिजन कार्यालय प्यूठानका प्रमुख विशुनदास लामाले भने,‘साँघुरो ठाउँमा ग्याविन वाल पनि लगाउँदै छौ ।’

२०६५ सालमा कालोपत्रे भएको  सडक साँघुरा भई ट्राफिक जाम धान्न नसक्ने भएकाले डवलेनको निर्माणको लागि बजेटको व्यवस्था गर्ने माग गरिएको सङ्घीय सांसद सूर्य थापाले बताए । ‘लुम्बिनी प्रदेशको राजधानी भालुबाङ पुग्नको लागि अन्य जिल्लालाई समेत यो सडक पायक पर्छ,’ उनले भने, ‘अव सिङ्गल लेनले सवारी चाप धान्न सक्दैन ।’ सडक विभाग, अर्थ मन्त्रालयमा पहल गरेर गत वर्ग नियमित काम बाहेक १५ करोड बढी बजेट थप गरेर अप्ठ्यारो क्षेत्रमा सडक सुधारका काम गरिएका थापाले बताए ।