२०८२ जेठ २प्यूठान अस्पताल भवन अलपत्र परेको छ । निर्माणको जिम्मा दिएको ठेकेदार बेखबर छन् । भवन निर्माणको ठेक्का ग्राण्ड डिजाइन कन्स्ट्रक्सन प्रा.लि नेपालगन्जले लिएको थियो ।
निर्माण गर्दै गर्दा निर्माण कम्पनी सम्पर्क विहीन भएपछि कारबाही प्रक्रिया अगाडि बढाएको सहरी विकास तथा भवन कार्यालय दाङले जनाएको छ ।
‘हामीले ठेकेदारलाई पटक पटक ताकेता गरिरहेका छौ,’ कार्यालय प्रमुख ईश्वरी प्रसाद देवकोटाले भने,‘ठेकेदार सम्पर्कमा नआएपछि उनको बैङ्क ग्यारेन्टी तान्न बैङ्कलाई पत्र पठाइएको छ ।’
भवन अलपत्र परेको विषयमा धेरै गुनासो आएको प्रमुख जिल्ला अधिकारी दिपकराज नेपालले बताए । उनले कार्यालयलाई यस विषयमा जानकारी गराई आवश्यक प्रक्रिया अगाडी बढाउन लगाएको बताए ।
अस्पतालको भवन समयमै निर्माण नहुने देखिएको प्यूठान अस्पतालका मेडिकल सुपरिटेन्डेन्ट ओम अर्यालले बताए ।
‘भवन अभाव झेलेर बिरामीको उपचार गराउनु परेको छ ,’ अर्यालले भने,‘समयमै भवन बन्ने देखिँदैन ।’ भवन निर्माणको चरणमा पहिलेका केही संरचना भत्काईएकाले झन् समस्या भएको उनले बताए ।
२१ करोड ३० लाख ५३ हजार ७ सय ६८ रुपैयाँ लागतमा भवन निर्माणको ठेक्का सम्झौता भएको थियो ।
२०८३ जेठ ६ गते निर्माण सम्पन्न गर्ने संझौता भएको भवनको हाल १५ प्रतिशत मात्र भौतिक प्रगति भएको कार्यालयले जनाएको छ ।
हाम्रा सामाग्रीहरू झुलेनी युनाइटेड नेटवर्क प्रा.ली. द्वारा सञ्चालित निम्न सञ्चारमाध्यममा हेर्न, पढ्न र सुन्न सकिन्छ ।
