बाग्दुला–मच्छि–ठुलावेशी सडक कालोपत्रे हुने चर्चाले त्यस सडकबाट यात्रा गर्ने उत्तरी प्यूठानका जनतामा आशा जगाएको छ । २०५४ सालदेखि सहिद मित्रमणी मार्गको नामबाट सुरु भएको बाटो ट्र्याक ओपान भएको वर्षौँ पछि विभिन्न निकायबाट बजेट परेर काम हुन थालेपछि कालोपत्रे हुने आशा स्थानीयले गरेका छन् ।

वर्षा याममा हिलाम्य र हिउँदमा धुलाम्य हुने यो सडक प्यूठान नगरपालिका, झिमरुक गाउँपालिका, गौमुखी गाउँपालिका सँगै गुल्मी र बागलुङ जिल्ला जोडने सडक हो । भारतीय एग्जिम बैङ्कको सहयोगमा निर्माण हुने भनिएको बाग्दुला भिमगिठे सडक निर्माण सुरु नहुँदै अलपत्र बनेपछि १० वर्षदेखि यो सडक मर्मतको काम समेत हुन सकेको थिएन ।

चालु आर्थिक वर्षमा बाग्दुला देखि ठुलावेसी सम्मको खण्डमा ७ करोड ८ लाखको काम भइरहेको छ । झिमरुक गाउँपालिका बाट विनियोजन भएको २ करोड रुपैयाँ, झिमरुक गाउँपालिका-सङ्घीय समपूरक अनुदान २ करोड र झिमरुक कोरिडोरको १ करोड गरी ५ करोड रुपैयाँबाट अहिले बतासेडाँडा–ज्यामुरखोला सडक खण्डमा ठेक्का मार्फत काम भइरहेको छ ।

उक्त ५ करोड बजेट बाट ५.२ किलोमिटर सडकमा व्याक कटिङ, नाला र स्टक्चर सहित(प्लम कङक्रिट) १ हजार २ सय ६४ घन मिटर, ग्याविन ३ सय ५० घन मिटर, नाला, कजवय र कल्भर्ट लगायत आरसिसी १ सय ८० घन मिटर र पिसिसि ३ सय ७६ घन मिटरको काम गर्ने गरी ठेक्का भएर काम भइरहेको झिमरुक गाउँपालिकाका अध्यक्ष पित बहादुर महतरा क्षेत्रीले जानकारी दिए ।

चालु आर्थिक वर्षमा नै सङ्घीय सरकार, सहरी विकास मन्त्रालय अन्तर्गत स्थानीय पूर्वाधार विकास आयोजना कार्यालय बुटवल अन्तर्गत मच्छि लिवासे खण्डमा १ करोड ८ लाख ३८ हजारको आरसिसी, नाला लगायतको काम भइरहेको कार्यालयका इन्जिनियर हेमराज बन्जाडेले बताए ।

सङ्घीय सरकार भौतिक पूर्वाधार तथा यातायात मन्त्रालय, सडक डिभिजन कार्यालय जस्पुर मार्फत १ करोड रुपैयाँ बराबरको बाग्दुला–मरन्ठाना खण्डमा कटिङको काम भइरहेको कार्यालय प्रमुख विसुन्दास लामाले बताए । मरन्ठाना(खरिबोट) देखि मच्छि खण्डमा काम हुने गरी सोही कार्यालय मार्फत थप बजेट मार्फत ४ करोड बराबरको काम गर्ने गरी  सडकले ठेक्का निकालेको छ । यो ठेक्कामा ब्याक कटिङ, आरसिसी लगायतका काम गरिने कार्यालय प्रमुख लामाले बताए ।

सोही सडक खण्डमै लुम्बिनी प्रदेश भौतिक पूर्वाधार विकास मन्त्रालय, सडक पूर्वाधार विकास कार्यालय खलङ्गा मार्फत ७५ लाख रुपैयाँ विनियोजन भए पनि अझै ठेक्का खुल्न बाँकी छ । वहुवर्षिय आयोजना अन्तर्गत श्रोत सुनिश्चितताका लागि अर्थमा पठाइएको र अर्थबाट श्रोत सुनिश्चितता भएपछि वहुवर्षिय योजनाको रूपमा ठेक्का खोलिने कार्यालय प्रमुख चन्द्र शाहले जानकारी दिए ।