सरुमारानी गाउँपालिका ४ का काशीराम शर्माले वषौँदेखि बाँझो रहेको जमिन भाडामा लिएर चक्लाबन्दी अदुवा–बेसार खेती सुरु गरेका छन् । सुपा देउराली तरकारी फर्म दर्ता गरेर शर्माले बाझिएर जङ्गल बनिसकेको जमिनमा चक्लाबन्दी खेती सुरु गरेका हुन् । उनले सरुमारानी  ३ वेओरेमा  करिब २ सय रोपनी भन्दा बढी जग्गा भाडामा लिएर चक्लाबन्दी खेती थालेका छन् ।

“यो जमिन पुरै बाझिएर रुख उम्रिएका थिए” शर्माले झुलेनी पोष्ट सँग भने–“बाझिएको जमिनका बिरुवा फाँडेर खेती सुरु गरेको छु ।” ७ जना स्थानीयको वर्षौँदेखि बाँझो रहेको जमिन वार्षिक ५० हजार भाडामा लिएर खेती सुरु गरेको उनले बताए । शर्माका अनुसार भाडामा लिएको मध्य केही जग्गा २० वर्षदेखि बाँझो थियो भने केही ६–७ वर्षदेखि बाझिन सुरु गरेको थियो ।

१५ वर्षदेखि व्यावसायिक मौरिपालन गरिरहेका शर्माले यो वर्ष २ सय क्विन्टल अदुवा र १ सय क्विन्टल बेसार रोपिरहेका छन् । १० क्विन्टल अदुवा र ५ क्विन्टल बेसार फलाउने लक्ष्य राखेको बताउने शर्मालाई प्रधानमन्त्री कृषि आधुनिकीकरण परियोजनाले ५० प्रतिशत लागत सहयोग गरेको छ । १२ लाख ५० हजार कार्यक्रमसँग सम्झौता भएको र त्यति नै रकम आफूले लगानी गर्ने उनको भनाई छ । कार्यक्रममार्फत बिउ उपचार, रोप्ने कार्य लगायतका लागि तालिम समेत दिइएको छ ।

प्रधानमन्त्री कृषि आधुनिकीकरण परियोजनामार्फत प्यूठान जिल्लामा ३ स्थानमा चक्लाबन्दी अदुवा–बेसार खेती सुरु गरिएको छ ।

यस्तै नौवहिनी गाउँपालिका ४ को  खबाङमा पनि चक्लाबन्दी अदुवा खेती सुरु गरिएको कार्यालयले जनाएको छ । खवाङमा सहकारी मार्फत, सुजिनपुरमा सामूहिक र वेओँरेमा व्यक्तिगत रूपमा चक्लावन्दि खेती सुरु भएको परियोजना कार्यान्वयन इकाई प्रमुख चुमानसिंह गिरीले बताए । कार्यालयको ५० प्रतिशत र कृषकको ५० प्रतिशत साझेदारीमा चक्लाबन्दि खेती सुरु गरिएको हो । यो वर्ष जिल्लाका तीन ठाउँमा गरी ५ सय ५० रोपनी क्षेत्रफलमा चक्लाबन्दि खेती गरिएको गिरीले बताए ।  यस वर्ष कार्यालय मार्फत किसानसँगको साझेदारीमा चक्लाबन्दि अदुवा, बेसार खेतीमा ३७ लाख रुपैयाँ लागत साझेदारी गरेको कार्यालयले जनाएको छ ।