प्यूठानको मल्लरानी – ३ बर्बाेटको भानुभक्त माध्यमिक विद्यालयले मंसिरमा स्वर्ण महोत्सव गर्ने भएको छ ।

शुक्रबार बसेको महोत्सव मूल आयोजक समिति सचिवालय बैठक पछि पत्रकार संम्मेलन मार्फत महोत्वस गर्ने निर्णय सार्वजनिक गरेको हो । आउने मंसिर २९ देखि महोत्सव गर्ने तयारी गरिएको प्रधानाध्यापक चक्रपाणी पौडेलले बताए । २०३२ सालमा साविकको धरमपानी गा.वि.स.९ मैदानामा स्थापना भएको विद्यालय २०३४ मा बर्बाेटमा स्थानान्तर भएको थियो ।

५० औं स्थापना दिवस मनाउन जिवलाल खत्रीको संयोजकत्वमा मूल आयोजक समिति गठन गरेको छ । महोत्सव सम्पन्न गर्न ५ हजारदेखि  ९ हजार ९ सय ९९ सम्म सहयोग गर्ने सहयोग दाताहरुको नाम, ठेगाना शिलापत्रमा राख्ने, १० हजारदेखि माथि सहयोग गर्नेको नाम, ठेगाना सामाजिक सञ्जालमार्फत सार्वजनिक गरि स्वर्ण स्तम्भमा अभिलेखिकरण गर्ने निर्णय भएको विद्यालयले जनाएको छ ।

स्मारिक प्रकाशन गर्न मल्लरानी २ ले १ लाख र महोत्सव सम्पन्न गर्न ३ नम्बर वडाले ५० हजार रुपैयाँ सहयोग गरेको वडाध्यक्ष नोमराज पौडेलले बताए ।

पूर्व विद्यार्थीहरुलाई पुर्नमिलन गर्दै  रुपन्देहिमा  समिति बनाएर सहयोग संकलन गर्ने तयारी गरिएको पूर्व विद्यार्थी कृष्णराज पाण्डेले बताए । एसईई र प्लस टु पास गरि विभिन्न पेशा मार्फत स्कुलको नाम चिनाउने विद्यार्थीलाई सम्मान गर्ने तयारी विद्यालयले गरेको छ ।