निजी विद्यालय सञ्चालकहरूले खलङ्गामा कोणसभा सम्पन्न गरेका छन् ।

निर्माणाधीन शिक्षा ऐनमा राखिएको प्रावधानको विरोध गर्दै अहिले निजी विद्यालय सञ्चालकहरू देशव्यापी आन्दोलनमा छन् । सोही आन्दोलन अन्तरगत नै सदरमुकाममा कोणसभा गरी प्रमुख जिल्ला अधिकारीमार्फत प्रधानमन्त्रीलाई ज्ञापन पत्र बुझाइएको प्याब्सन प्यूठानका सचिव शरद गौतमले बताए ।

सङ्घीय संसद्को शिक्षा स्वास्थ्य सूचना तथा प्रविधि समितिबाट पारित भर्ई प्रतिनिधिसभामा टेबुल गरिएको विधेयक सच्याउनु पर्ने निजी विद्यालय सञ्चालकहरूको माग छ । प्याब्सन, नेशनल प्याब्सन, हिसान, अपेन र एनएमए ले उक्त विधेयकको संयुक्त रूपमा विरोध गरिरहेका छन् ।

विरोध कार्यक्रम अन्तरगत नै सदरमुकाममा कोणसभा गरिएको हो । प्याब्सन प्यूठानका अध्यक्ष दिपेन्द्र जि.सी. को अध्यक्षतामा भएको कोणसभालाई प्याब्सनका पूर्व केन्द्रीय सदस्य जगन्नाथ पोख्रेल र सल्लाहकार गिर बहादुर भण्डारीले सम्बोधन गरेका थिए ।