प्यूठान–बिजुवार–बाग्दुला सडक खण्ड मदन भण्डारी राजमार्ग अन्तर्गत डीपीआर नभएको आयोजनाले जनाएको छ । गुल्मीको तम्घास सिमल टारी,प्यूठान सौतामारे हुँदै हाल मच्छिसम्म मात्र डीपीआर भएर काम भइरहेको आयोजना प्रमुख रमेश चौधरीले बताए ।  डीपीआर भएर नेपाल सरकाले सडकको क्षेत्र तोकेपछि मात्र सडकको सीमा कायम हुने चौधरीले बताए ।

‘हाल बाग्दुलादेखि बिजुवार–चकचके खण्ड सहायक राजमार्ग अन्तर्गत पर्छ’ उनले भने, ‘यसलाई राष्ट्रिय राजमार्ग कायम गर्नकालागि नेपाल सरकारले डिपीआर स्वीकृत गरेर निर्णय थाल्नुपर्छ ।’ सार्वजनिक सडक ऐन २०३१ को दफा ३ अनुसार सहायक राजमार्ग केन्द्र रेखा देखि दायाँ/बायाँ दुवै तिर पन्ध्र/पन्ध्र मिटर तोकेको छ ।

चौधरीका अनुसार यो सडकको सीमा हालकालागि पन्ध्र/पन्ध्र हो । यसलाई फेर्न नेपाल सरकार मन्त्रीपरिषद्ले निर्णय गरेर सीमा तोक्नुपर्छ । केही वर्ष पहिले यो सडकको चकचकेदेखि जुम्रीसम्म पन्ध्र/पन्ध्र मिटर दायाँ/बायाँ सीमा कायम गरी सिमेन्टका पोल समेत गाडिएको थियो । तर अझैसम्म सडक लगत कट्टा  भने भएको छैन ।

नेपाल सरकार मन्त्री परिषद्को २०७८ वैशाख १३ को निर्णय अनुसार मदन भण्डारी राजमार्ग प्यूठान क्षेत्रमा सौतामारे– मन्छी– बाग्दुला –बिजुवार चकचके हुँदै जाने भनिए पनि सडकको चौडाइ भने तोकिएको छैन । सडक क्षेत्रका घर निर्माण गर्दा नक्सा पास सडक डिभिजन कार्यालय प्यूठानको रायअनुसारै पन्ध्र सेडव्याक थप ६ मिटर  कायम गरेर प्यूठान नगरपालिकाले दिने गरेको छ ।

हालको सवारी चापलाई मध्यनजर गरेर प्यूठान नगरपालिकासँग समन्वय गरी क्वाडिदेखि साडेखोलासम्म साडेसात/साडेसात मिटर चौडा बनाउने काम भइरहेको सडक डिभिजन कार्यालय प्यूठानका प्रमुख दिपक सुनारले बताए । ‘हाल  दाखाक्वाडि क्षेत्रमा निर्माण भएको सडकको सीमा यत्ति हो भनेर बुझ्नु भएन’ उनले भने, ‘यो त केही समय सवारी चाँप घटोस् भन्ने मात्र हो ।’ उनले सडकको सीमा साडेसात मिटर भयो भनेर भौतिक संरचना नबनाउन स्थानीयलाई सुझाव समेत दिए ।