कोरोना भाइरसका कारण नेपालभित्र र अन्य मुलुकमा रोजगार गुमाएर खाली वसेका नागरिक हरुलाई प्यूठान नगरपालिकाले रोजगार दिएको छ ।

नगरपालिकाले १० वटै वडामा रोजगार गुमाएका साथै वेरोजगार वसिरहेका स्थानीयलाई मानविय श्रमवाट संभव हुनेखालका सडक मर्मत गर्ने काम लगाएर रोजगारी दिएको मेयर अर्जुनकुमार कक्षपतिले बताउनुभयो ।

नगरपालिकाभर झन्डै ६० लाख रुपैयाँ बराबरको काम स्थानीयलाई दिन थालिएको कक्षपतिले बताउनुभयो । स्थानीयलाई गाउँमै रोजगारी दिने उद्देश्यले यसपालि कडा चट्टान, ढुंगा खसेको स्थान बाहेका सबै स्थानका सडकहरु मान्छेले सोहोर्ने, मर्मत गर्नेगरी प्राविधिक स्टिमेट गराएर उपभोक्ता समिति मार्फत काम अगाडि बढाइएको कक्षपतिले बताउनुभयो । अघिल्ला वर्षहरुमा बर्खामा बिग्रेका सडक डोजर, स्काभेटर, जेसीबी मार्फत सोर्न गरिन्थ्यो ।

मेयर कक्षपति समेत स्थानीयसँगै फरुवा, कोदाली बोकेर काममा खट्नुभएको छ। ‘सडक मर्मतको काम नसकिदासम्म हरेक दिन काम गर्ने योजना बनाएको छु,’ कक्षपतिले भन्नुभयो, ‘यसले जनतासँग आत्मियता, बढ्दै गएको छ ।’