जिल्ला सदरमुकाम खंलगामा अवस्थित प्युठान आयुर्वेद स्वास्थ्य केन्द्रमा ल्याब सेवा सञ्चालनमा आएको छ । बुधवारदेखी पूर्ण रुपमा ल्याब सेवा सञ्चालनमा ल्याईएको केन्द्रका बरिष्ठ कविराज निरीक्षक शिसिर पोख्रेलले जानकारी दिनुभयो । प्रदेश सरकारको बजेटबाट अघिल्लो आर्थिक वर्षमा ल्याब सञ्चालनका लागि सामाग्रीहरु खरिद गरिएपनि चालु आर्थिक वर्षमा ल्याब टेक्निसियन नियुक्त गरी सेवा सुचारु गरिएको उहाँले बताउनुभयो ।
ल्याबबाट ब्लड सुगरको जाँच, किड्नी सम्बन्धी जाँच, कलेजो सम्बन्धि सम्पूर्ण जाँच, कोल्डस्ट्रोलको जाँच,बाथरोग सम्बन्धि जाँच, अल्सर सम्बन्धी जाँच, एच.आई.भी, मलेरीया, हेपटाईटीस, डेङ्गो लगाएतका जाँच हुने ल्याब टेक्निसियन विनोद के.सी.ले जानकारी दिनुभयो । सेवा सञ्चालन भएको एकहप्तासम्म निशुल्क ल्याब सेवा दिने र त्यसपश्चात न्युनतम शुल्क लिईने उहाँले बताउनुभयो । केन्द्रबाट ल्याब सेवा सञ्चालनले सेवाग्राहीलाई सहज हुने विश्वास लिएको उहाँले बताउनुभयो ।
०५५ सालमा स्थापना भएको प्युठान आयुर्वेद स्वास्थ्य केन्द्र खंलगामा गत साउनदेखी डाक्टर सहितको सेवा समेत सुरु गरिएको छ । हाल केन्द्रबाट ओपिडी सेवा, पञ्चकर्म सेवा, ६० वर्ष देखी माथिका जेष्ठनागरिकलाई निशुल्क औषधी वितरण, ६ महिना सम्मका सुत्केरी आमाहरुलाई दुग्दवर्धक औषधी वितरण कार्यक्रम लगाएतका सेवाहरु दिईरहेको केन्द्रका बरिष्ठ कविराज निरीक्षक पोख्रेलले बताउनुभयो । केन्द्रमा दैनिक २०÷२५ जना बिरामीहरु सेवा दिन आउनेगरेका छन् । केन्द्रमा विशेष गरी जीर्ण रोगी, बाथ, युरिकेसिड, जण्डीस, पिसाब, पेट रोगका बिरामीहरु आउने गरेको उहाँले बताउनुभयो ।