काठमाडौं । नेकपा एमाले विभाजन गरेर नयाँ पार्टी स्थापना गर्न वरिष्ठ नेताहरू झलनाथ खनाल, माधवकुमार नेपाल र वामदेव गौतम एक ठाउँमा उभिने भएका छन् । राष्ट्रपतिबाट अध्यादेश जारी भएलगत्तै राजनीतिक रूपमा पुस ५ पछि नै फुटिसकेको एमाले कानूनीरूपमा पनि विभाजित हुनेछ ।

एमाले विभाजनमा माधव नेपाल समूहका दोस्रो पुस्ताका नेताहरू डराए पनि पहिलो, तेस्रो तथा चौथो पुस्ता भने एक ठाउँमा छन् । त्यसैले पछिल्लो समय नेपालले वार्ताकार दोस्रो तहका नेताभन्दा तेस्रो र चौथो तहका नेता कार्यकर्तासँग सघन संवाद गरिरहेका छन् ।

यसबीचमा एमाले विभाजन रोक्न साथ खोज्दै दिल्ली पुगेका सुरेन्द्र पाण्डे र भीम आचार्यलाई झलनाथ खनालले ‘केपी ओलीसँग मिल्न सकिँदैन’ भनेर फर्कादिएपछि नेपाल समूह उत्साही छ । माधव नेपाल र झलनाथ खनालले अलग पार्टी बनाए आफू त्यसमा सहभागी हुने अर्का नेता वामदेव गौतमले बताइसकेका छन् ।

नेपालनिकट एक नेताले भने, ‘दोस्रो तहका केही नेता अझै पनि खुट्टा कमाइरहेका छन् । तर, हामीले विद्रोह गरेपछि उनीहरू पनि माधव नेपालको पछिपछि आउन बाध्य हुन्छन् । झलनाथले हप्काएर पठाएपछि उनीहरू हच्किएका छन् । अबको एमाले विभाजन २०५४ सालको भन्दा ठूलो स्केलको हुनेछ ।’

माधव नेपाल समूहले अध्यादेश मंगलबारै जारी भएको अवस्थामा सोही दिन अबेरसम्म दल दर्ता गर्नेगरी कागजपत्र तयार पारेको थियो । केन्द्रीय सदस्य र सांसदहरुको हस्ताक्षरसहित आवश्यक कागजात बोकेर राजेन्द्र पाण्डे निर्वाचन आयोगको सम्पर्कमा थिए ।

माधव नेपाल समूहले तलसम्मका कार्यकर्तालाई सर्कुलरमार्फत अब झलनाथ, माधव र वामदेवको नेतृत्वमा पार्टी पुनर्गठन हुने र वडादेखि केन्द्रसम्म समानान्तर संरचनाहरू बनिसकेकाले एमालेभन्दा ठूलो पार्टी बन्ने भनेर उत्साहित बनाइरहेको छ । आउने चुनावमा कांग्रेससहित अहिलेको सत्तारुढ गठबन्धनले एमालेविरुद्ध एक भएर चुनाव लड्ने जानकारीसमेत तलैसम्म पठाइएको छ ।

तर, घनश्याम भुसालले एकताको लागि अन्तिम प्रयास गर्छु भन्दै अर्याल होटलमा पुगेर माधव नेपालको अनुमति मागे । त्यतिन्जेल १४ जनामाथि कारवाहीको पत्र संसद सचिवालयमा पुगिसकेको थिएन । नेपालले भुसाललाई फागुन २८ पछि केपी ओलीले गरेका सबै निर्णय फिर्ता र समान हैसियत र हस्ताक्षरको अध्यक्ष आफ्नो बटमलाइन भनेका थिए ।

तर, त्यसबीच माधव नेपालसहित १४ जनालाई कारवाही गरिएपछि नेपाल पक्षले एकताको अन्तिम सर्त भनेर कारवाही फिर्ता, हालसम्मका सबै निर्णय खारेज र समान हैसियत र हस्ताक्षर चल्ने अर्को अध्यक्षमा ओली सहमत भएमात्र एमाले विभाजन रोकिने बताएको छ ।

मंगलबार साँझ अध्यक्ष ओलीलाई भेट्न उपमहासचिव भुसाल बालकोट गएका थिए । उनले माधव नेपालसहित १४ जनामाथिको कारवाही फिर्ता लिए एकताको प्रयास गर्न सजिलो हुने बताए । तर, ओलीले माधव नेपाल पार्टी फुटाउन अग्रसर भइसकेको र उनकै आग्रहमा अध्यादेश ल्याइएकाले कारवाही फिर्ता नहुने जवाफ दिए ।

ओलीसँगको वार्ता सकारात्मक नभएको जानकारी भुसालले नेपाल समूहका नेताहरूलाई गराएका छन् । भीम रावल, सुरेन्द्र पाण्डेलगायतका नेताहरू विभाजन रोक्न सक्रिय रहे पनि एक-दुई दिनयता उनीहरूको सक्रियता घटेको छ ।

माधव नेपाल समूहले तलसम्मका कार्यकर्तालाई सर्कुलरमार्फत अब झलनाथ, माधव र वामदेवको नेतृत्वमा पार्टी पुनर्गठन हुने र वडादेखि केन्द्रसम्म समानान्तर संरचनाहरू बनिसकेकाले एमालेभन्दा ठूलो पार्टी बन्ने भनेर उत्साहित बनाइरहेको छ । आउने चुनावमा कांग्रेससहित अहिलेको सत्तारुढ गठबन्धनले एमालेविरुद्ध एक भएर चुनाव लड्ने जानकारीसमेत तलैसम्म पठाइएको छ ।

राजनीतिक दलसम्बन्धी अध्यादेशले स्थानीय तहका जनप्रतिनिधिले समेत दल रोज्न पाउने र एमाले छाडेवापत पद नजाने भनेकाले वडा सदस्यदेखि संघीय सांसदम्मका जनप्रतिनिधिको ठूलो हिस्सा आफूतिर तान्न माधव पक्षले सबै तहका नेता/कार्यकर्तालाई आ-आफ्नो ठाउँबाट खटिन भनेको छ । नेपाल प्रेसबाट साभार ।