२०७८ पुष २२, प्यूठाननेपाली कांग्रेस प्यूठानको राजनीति पेचिलो बन्दैछ । जिल्ला समिति प्यूठानको १४ औं अधिवेशन पश्चात कांग्रेस प्यूठानका दुई समुह पानी बारावारको अवस्थामा पुगेका छन् । अधिवेशन सम्पन्न भएको महिनौं बित्दा पनि तुस मेटिएको छैन । नौबहिनी गाउँपालिकाको सिंगो समितिले कांग्रेस नेता डा. गोबिन्दराज पोख्रेललाई बहिष्कार गर्ने निर्णय सार्वजनिक गरेको छ । आफ्नै नेतालाई गाउँपालिका प्रवेशमा रोक लगाउने यो निर्णय प्यूठान मात्र नभई देशमै नौलो बनेको छ ।
सार्वजनिक भएको माइन्युटमा नौबहिनीका हरेक कार्यक्रममा सहभागी नगराउने र कार्यक्रमबाट बहिष्कार गर्ने निर्णय छ । गाउँपालिका समितिका अध्यक्ष देविराम पुनको अध्यक्ष सहित सम्मिलित पदाधिकारीको निर्णय सार्वजनिक हुँदा कांग्रेस मात्र नभई अन्य दल समेत चकित परेका छन्। जिल्ला सभापतिमा नौबहिनी गाउँपालिका अध्यक्ष शिव रिजाल र गौमुखी गाउँपालिका अध्यक्ष विष्णुकुमार गिरीको उम्मेद्वारी थियो । अधिवेशनको मतगणनाको क्रममा रिजाललाई गिरीले उछिन्न थालेपछि रिजाल पक्षका समर्थकले भिडन्त गरेको गरेको गिरी पक्षले आरोप लगाएको छ भने रिजाल पक्षले जितको उन्मादमा गिरी पक्षले आक्रमण गरेको टिप्पणी छ ।
घटना पश्चात दुवै पक्षका एकले अर्कालाई आक्रमक शैलीमा बिज्ञप्ती जारी गरेका थिए। केहिँ समय शान्त रहेको दोहोरो पक्षको लडाई फेरि पछिल्लो हप्तादेखि चुलीमा पुगेको छ । गाउँपालिका प्रवेश नै निशेध गर्न थालेपछि अर्को पक्षको उत्तरको पर्खाइमा छन् उनिहरु । निर्वाचन सकिएको लामो समय बित्दा पनि अधिवेशनको दाग मेटिन सकेको छैन। अधिवेशनमा एउटै पार्टीमा दुई उम्मेद्वार बनेपछि बिजयी हुने एउटा मात्रै हो। तर पराजयपछि हार स्विकार्नु र बिजयपछि नैतिकता देखाएर कर्तव्यनिष्ठ बन्न जरुरी हुने कि !
