२०७९ जेठ १६ प्यूठानऐरावती गाउँपालिका–१ दाङवाङमा भरुवा बन्दुकको गोली लागेर एकजनाको ज्यान गएको छ ।
शिकार खेल्न जंगल गएका ३४ वर्षीय द्रोणबहादुर आलेमगरको आइतबार गोली लागेर मृत्यु भएको हो । दोबाटो सामुदायिक वनको डाँडाथरीमा शिकार खेल्ने क्रममा २४ वर्षीय ज्ञान बहादुर नेपालीले मृगलाई हानेको गोली आलेमगरको टाउकोमा लागेको प्रहरीले जनाएको छ ।
घटना आइतबार दिउँसो भए पनि प्रहरीलाई राती मात्र खबर आएको प्रहरी नायव उपरीक्षक सत्यनारायण थापाले बताए ।
प्रहरीले शिकार खेल्ने क्रममा प्रयोग भएको २ नाल भरुवा बन्दुक नियन्त्रणमा लिएको छ । त्यसैगरी बन्दुक हान्ने ज्ञानबहादुर नेपालीसहित दस जनालाई प्रहरीले पक्राउ गरेको छ ।
झिमरुक गाउँपालिका ४ मच्छीका ३२ वर्षिय गुञ्ज बहादुर पुन, ऐरावती गाउँपालिका १ अमिलीका बर्ष ६४ का ओम बहादुर पुन, सोही गाउँपालिका बर्ष ५३ का रुक बहादुर नेपाली, २४ वर्षिय ज्ञान बहादुर नेपाली (भरुवा बन्दुक हान्ने), २४ वर्षिय कृष्ण बहादुर पुन मगर, ६५ वर्षिय भुप बहादुर पुन मगर, ३२ वर्षिय टिकाराम पुन, ६० वर्षिय ड्याम बहादुर पुन, ३९ वर्षिय झबिन्द्र थापा र १४ वर्षिय बिशाल घर्तीलाई प्रहरीले नियन्त्रणमा लिएको छ भने ४ जना फरार रहेको जिल्ला प्रहरी कार्यालयले जनाएको छ ।
हाम्रा सामाग्रीहरू झुलेनी युनाइटेड नेटवर्क प्रा.ली. द्वारा सञ्चालित निम्न सञ्चारमाध्यममा हेर्न, पढ्न र सुन्न सकिन्छ ।
