ऐरावती गाउँपालिकाको केन्द्र बरौला पुग्ने मुख्य सडक चेरनेटा–बरौला सडकमा निर्माण भएको नालीले पानीको भेल थेग्न नसक्ने स्थानीयले गुनासो गरेका छन् ।
प्रदेश सरकाको बजेटमा सडक पूर्वाधार विकास कार्यालय प्यूठान मार्फत ठेक्का भएर (डिविएसडी) कालोपत्रे गर्न थालिएको सडकमा एसियन (कन्कृट) नवलपरासीको रेडिमेट (प्रिकास्ट) नाली प्रयोग गरिएको छ ।
प्रदेश सरकार भौतिक पूर्वाधार विकास मन्त्रालयले डिजाइन गरेर मिलोमतोमा राखिएको नाली राम्रो र स्थानीय आवश्यता बर्माेजिमको नभएको स्थानीयले आरोप लगाएका छन् । पहाडी भूभागमा तराइमा जस्तो सानो नालीले बर्खामा आउने भेललाई थेग्न नसक्ने स्थानीय दलबहादुुर थापाले बताए । उनले नाली निर्माणकै चरणमा साँगुरो देखिएको गुनासो गरे ।
मन्त्रालयले नै डिजाइन गरेको नाली प्रयोग गरिएको सडक पूर्वाधार विकास कार्यालय प्यूठानका निमित्त प्रमुख चन्द्र शाहले बताए । उनले नालीको विषयमा स्थानीयले गरेको गुनासोलाई मन्त्रालयमा राखेको बताए ।
चेरनेटादेखि १० दशमलभ ५ किलोमिटर सडक कालोपत्रे गर्नको लागि जलजला÷आँशु÷जयमा निर्माण कम्पनीले ८ करोड, ८ लाख, ६९ हजार ७ सय ३४ रुपैयाँमा निर्माणको ठेक्का लिएको छ । सडकको भौतिक प्रगती ६० प्रतिशत भएको कार्यालयले जनाएको छ ।