२०७९ साउन २५, प्यूठानजिल्लाका नौ वटै स्थानीय तहका बजार क्षेत्रहरुमा अनुगमन गरिएको छ । जिल्ला प्रसाशन कार्यालय प्यूठानको आन्तरिक सर्कुलर अनुसार जिल्लाका नौ वटै स्थानिय तहहरुले आफ्ना नगर तथा पालिका अन्तर्गतका बजार क्षेत्रमा आज एकै चरणमा बजार अनुगमन गरेका छन् । नगर तथा पालिकाका जनप्रतिनिधी तथा कर्मचारीहरुले खाद्यान तथा किराना पसल, एग्रोभेट सेन्रटर, होटल लगाएतका पसलहरुमा अनुगमन गरेका हुन् ।
अनुगमनका क्रममा नगर भित्रका केही पसलहरुमा म्याद गुर्जिएका सामान, कतै व्यवसाय नै दर्ता नगरी पसलहहरु संचालन गरेको पाईएको प्यूठान नगरपालिकाका कार्यवाहक एवम् प्यूठान नगरपालिका वडा नं.३ का वडा अध्यक्ष सुमन श्रेष्ठले जानकारी दिए ।
उनका अनुसार प्यूठान नगरभित्रका मुख्य बजार क्षेत्र बाग्दुला, चेरनेटा, क्वाडि, जुम्री, बिजुवार मरन्ठाना लगाएतका बजार क्षेत्रका ब्यवसायीहरुको फर्म अनुगमन गरिएको हो ।
अनुगमन टोलीले व्यवसायीहरुसगँ सल्लाह सुझाव समेत माग गरेका थिए । नगरपालिकाले व्यवसायीहरुको हक हितको निम्ती बोल्नुपर्ने, नगरपालिकाद्धारा फोहोरको सहि ढंगले व्यवस्थापन गर्नु पर्ने लगाएतका माग राखेका छन् ।
प्यूठान नगरपालिका सहित जिल्लाका नौ वटै स्थानीय तहका बजार क्षेत्रमा आज अनुगमन गरिएको हो । मुलुकको संघिय संरचना अनुसार स्थानीय तहहरुले बजार अनुगमनको जिम्मा पाएका थिए ।
