जिल्लामा आज आइतबारदेखी ५ – ११ वर्ष सम्मका बालबालिकालाई कोभिड – १९ विरुद्धको फाइजर–बायोएनटेक खोप लगाउन सुरु गरिएको छ । कोभिड – १९ विरुद्धको खोप अभियान अन्तर्गत ५ वर्ष देखी ११ वर्षसम्मका बालबालिकालाई खोप लगाउन सुरु गरिएको हो ।

जिल्लाभरका ३८ हजार ४ सय ९४ जना लक्षित वर्गका बालबालिकालाई बायोएनटेक खोप दिने लक्ष्य रहेको छ । स्वास्थ्य कार्यालय प्यूठानको निर्देशनअनुसार जिल्लाका नौ वटै स्थानीय तहहरुले आजदेखी भदौ ११ गते सम्म एकै चरणमा खोप अभियान सुरु गरेका छन् ।

जिल्लाका ३ सय ७८ वटा खोप केन्द्रबाट वडाका विद्यालयहरुबाट खोप दिन थालिएको छ । खोप अभियानका लागि जिल्लाभर ५ सय ९ जना स्वास्थ्यकर्मी र १ हजार १८ जना स्वंयसेवक खटिएका छन् ।

५ वर्ष देखी १२ वर्ष मुनिका बालबालिकाहरुलाई दिइने फाइजर बायोएनटेक खोप सुन्तला रगंको बिर्कोले चिनाईएको छ ।
देशभरका ३९ लाख ९५ हजार ८ सय ६८ जना लक्षित समुहका बालबालिकालाई यो खोप दिइने छ । यो खोपको प्रभावकारिता ९१ प्रतिशत रहेको अध्ययनले देखाएको छ ।