लकडाउनको समयमा माछा मार्न माडी नदीमा गएका एक बालकको आज डुबेर ज्यान गएको छ ।
माछा मार्नका लागि साथीसंग गएका प्यूठानको स्वर्गद्वारी नगरपालिका वडा नं. ३ बाटुलेका १० बर्षिय बालक आर्जु खत्री क्षेत्रीको माडी नदीमा डुबेर ज्यान गएको इलाका प्रहरी कार्यालय भिंगृले जनाएको छ। ज्ञान मन्दिर विद्या गृह खुंग्री रोल्पामा कक्षा १ मा अध्ययनरत खत्री बिहान करिब ११ बजेतिर माछा मार्न जान लागेका स्थानियहरुको पछि लागेर खोलामा गएको स्थानियले बताएका छन्। उनको शव पोष्टमार्टमका लागि प्राथमिक स्वास्थ्य केन्द्र भिंगृमा लगिएको प्रहरीले जनाएको छ। घटनाबारे थप अनुसन्धान भईरहेको इलाका प्रहरी कार्यालय भिंगृका प्रमुख बुद्धि रानाले जानकारी दिनुभयो।