सबैका लागि खेलकुद’ ‘स्वास्थ्यका लागि खेलकुद’ भन्ने नाराका साथ प्युठानमा आयोजित दोस्रो मदन भण्डारी स्पोट्स खुल्ला दौड -हाफ म्याराथुन) प्रतियोगिताको उपाधी दुर्गाराज बुढाले जित्नुभएको छ ।

मदन भण्डारी स्पोर्टस ऐकेडेमी प्युठानले नया बर्षको अवसर पारेर अल्ट्राधावक एवं पर्बतारोही संजय पण्डितको स्मृतीमा प्रतियोगिता आयोजना गरेको हो । प्रतियोगितामा ४९ जना सहभागी प्रतिस्पर्धीलाई उछिन्दै रुकुमको साख गाउँपालिका ५ का दुर्गाराज बुढाले उपाधी हात पार्नुभएको हो । उहाले १५ किलोमिटरको दुरी ५७ मिनेट ६ सेकेण्डमा पार गर्नुभयो ।

त्यस्तै ५८ मिनेट ८ सेकेण्डमा सोही दुरी पार गरी नेपाली सेनाका जनक चन्द दोस्रो र ५८ मिनेट ५७ सेकेण्डमा दुरी पार गर्दै प्युठान स्याउंलिवाङका रुपलाल बुढामगर तृतीय हुनुभएको हो । कार्यक्रममा प्रथम, द्वितीय र तृतीय स्थान हासिल गर्नेहरुलाई क्रमशः नगद ३० हजार, २० हजार र १५ हजार रुपैयाँ, मेडल र प्रमाणपत्र प्रदान गरिएको छ ।
त्यस्तै उत्कृष्ट ७ भित्र परेका अन्य चार प्रतियोगी निमवाङ तामाङ,दामोदर बुढामगर,हिरा कुमाल र कृष्ण बुढालाई प्रोत्साहन स्वरुप नगद,मेडल र प्रमाणपत्र प्रदान गरियो ।
कार्यक्रमका प्रमुख अतिथि एवम् एकेडेमीका केन्द्रीय अध्यक्ष तथा विनोद श्रेष्ठले पुरस्कार वितरण गर्नुभएको थियो ।

शनिवार बिहान जिल्लाको चकचके देखि बाग्दुला बजार सम्मको १५ किलोमिटर दुरीमा प्रतियोगिता आयोजना गरिएको मदन भण्डारी स्पोट्रस एकेडेमी प्युठानका अध्यक्ष युवराज केसिले जानकारी दिनुभयो ।