बिपद पुर्ब तयारी तथा प्रतिकार्य योजना निर्माण सम्बन्धि कार्यशाला गोष्ठी गौमुखीमा सम्पन्न भएको छ । कार्यशालाले गौमुखी गाउँपालिकामा हुने बिपदलाई कसरी न्यूनीकरण गर्न सकिन्छ भनेर ८ वटा क्लस्टरको विषयमा समिक्षा गरेको छ । विपदको बेला तत्काल उद्दार, राहत र पुनः स्थापना लगायतको क्षेत्रमा चासो दिनुपर्ने सहभागीहरुको भनाइ छ ।

कार्यशाला गोष्ठीमा प्युठानका प्रमुख जिल्ला अधिकारी मदन कोइरालाले गाउँपालिका स्तरमा बिपदबाट हुने समस्या समाधानका लागि स्थानीयको भुमिका महत्वपुर्ण हुने बताए । विपदको बेला स्थानीयहरु तत्काल उद्दारमा लाग्दा बिपद न्यूनीकरणमा टेवा पुग्ने उनको भनाइ छ।

त्यस्तै प्रमुख अतिथी जिल्ला समन्वय समिति प्युठानका उपप्रमुख दुर्गा रेग्मीले बिपद जति बेला पनि आउन सक्ने भएकोले गौमुखी गाउँपालिकाले राम्रो कामको सुरुवात गरेको बताइन।गौमुखीमा प्रायजसो चट्याङ्ग,बाढी पहिरो र आगालागीले क्षती गर्ने हुँदा बिपद प्रतिकार्य योजना आवश्यक रहेको उनको भनाई छ ।

कार्यक्रमको समापन गर्दै गौमुखी गाउँपालिका अध्यक्ष बिष्णु कुमार गिरीले बिपद प्रतिकार्य योजना निर्माण भईसकेपछि काम गर्न सहज हुने बताए । गाउँ बस्तीमा बाढी पहिरो आगालागी चट्याङ्ग लगायत आपद बिपदमा र महामारी जस्ता कार्यमा सबैले हातेमालो गरि समन्वय र सहयोग गर्नु पर्ने उनले बताए।

कार्यशाला गोष्ठीको सहजीकरण बिपद पुर्ब ब्यबस्थापन तथा प्रतिकार्य योजना निर्माणका बिज्ञ तथा पत्रकार महासंघ प्युठानका अध्यक्ष सन्जय रिजालले गरेका थिए भने गोष्ठीको सञ्चालन केशव के सी ले गरेका थिए ।