ऐरावती गाउँपालिकाले वडा नम्बर ५ को पकलास्थित पिलनेटामा पिकनिक पार्क निर्माण गरेको छ । ७ करोड २५ लाख रुपैयाँ लागत स्टिमेट गरेर पालिकाले पार्क निर्माणको योजना अगाडी सारेको हो ।

२०७६ सालबाट पार्क निर्माणको काम थालेको गाउँपालिका अध्यक्ष नविल बिक्रम शाहले बताए । पार्कमा बिभिन्न भौतिक पूर्वाधार निर्माण गर्न हालसम्म २ करोड ६ लाख ४८ हजार ७ सय ३७ रुपैयाँ खर्च भइसकेको गाउँपालिकाले जनाएको छ । प्रदेश सरकारको समानीकरण अनुदानमा पालिकाले पार्क निर्माणको योजना अगाडी बढाएको हो । पार्कमा पोखरी,चौतारी,शौचालय, आरामदायी सिमेन्टका कुर्ची, वाटर फाउन्टेन,लभसाइन, गोलघर, चिप्लेटी लगायतका पूर्वाधार निर्माण गरिएका छन् ।

ऐरावती गाउँपालिकाको मुख्य सडकको छेउमा पिकनिक पार्क पर्ने भएकाले दैनिक आवतजावत गर्ने मानिसहरुले समेत अवलोकन गर्ने गरेको उनको भनाई छ । डिपीआरमा भएका अन्य पूर्वाधार निर्माणको लागि प्रदेश सरकारसंग सहकार्य गरेर यस वर्ष पनि पार्क निर्माणका लागि बजेट विनियोजन गरेको पालिका अध्यक्ष शाहले बताए ।