सरुमारानी गाउँपालिका ३ गुरुङडाडाँका ३९ बर्षिय लिला बहादुर पल्ली विगत डेढ महिनादेखी प्यूठान अस्पतालको शैयामा थलिएका छन् । गत असार २२ गते श्रीमती सरिता पल्लीले जिल्ला अस्पताल बिजुवारमा उपचारको लागि ल्याएको अझै फर्किएका छैनन् ।

लिला बहादुरलाई दिमागको टिबी ९ मेनिन्जाइटिस भएको डा.पौडेष ज्ञवालीले बताए । पल्ली मेनिन्जाइटिसको औषधी सेवन गरिरहे पनि पूर्ण रुपमा होसमा भने आउन सकेका छैनन् । लामो समयसम्म विस्तारामा थलिदा (बेड सोर) भई उनको शरीरका विभिन्न भागमा ठूलाठूला घाउहरु निस्किएका छन् । चिकित्सकले बाहिर उपचार गर्न जान सल्लाह दिए पनि आर्थिक अभावका कारण बाहिर लैजान नसकिएको श्रीमती सरिता पल्लीले बताईन् ।

“घरको मुख्य व्यक्ति नै बेडमा थलिएपछि उपचार खर्च जुटाउन समस्या भएको छ,” । सरिताले भनिन, ‘कमाउने कोही छैनन्, घरबाट पनि कुनै चासो छैन ।’ श्रीमानको उपचारको लागि सरिताले सहयोगको याचना गरेकी छिन् ।