पेशागत महासंघ जिल्ला कमिटी प्यूठानले सुस्त श्रवण शक्ति भएका विद्यार्थीहरुलाई शैक्षिक सामग्री वितरण गरेको छ । आइतबार पेशागत महासंघ जिल्ला कमिटी प्यूठानको २९ औं स्थापना दिवसको अवसरमा भुवनेश्वरी माध्यमिक विद्यालय खैरामा शैक्षिक सामग्री वितरण गरिएको हो । विद्यार्थीहरुको शिक्षामा थप सहजता पुग्ने उद्देश्यले सुस्त श्रवण शक्ति भएका २० जना विद्यार्थीहरुलाई शैक्षिक सामग्री वितरण गरिएको पेशागत महासंघ प्यूठानले जनाएको छ ।

पेशागत महासंघ जिल्ला कमिटी प्यूठानका अध्यक्ष दल बहादुर के.सीको अध्यक्षतामा भएको कार्यक्रमको सञ्चालन भुवनेश्वरी माध्यमिक विद्यालयका शिक्षक चन्द्रकान्त पोख्रेलले गरेका थिए । कार्यक्रमको प्रमुख अतिथि नेकपा एमाले जिल्ला कमिटी अध्यक्ष बिजय विराज बिष्ट रहेका थिए ।