नेपाल कम्युनिस्ट पार्टी(माओवादी केन्द्र)निकट अखिल नेपाल महिला संघ(क्रान्तिकारी) प्युठान नगरपालिकाको प्रथम सम्मेलन मङ्गलवार जुम्रीमा सम्पन्न भएको छ ।

भेलाले लाली घर्तीको अध्यक्षतामा ४१ सदस्यीय नगर समिति सर्वसम्मत निर्वाचित गरेको हो । जसको उपाध्यक्षमा रेखा बस्याल, कमला थापा, सचिवमा सावित्रा घिमिरे, कोषाध्यक्षमा रुपा के.सी. लगायत रहेका छन् । कार्यक्रम  संघका   संयोजक तुलसा सुवेदीको अध्यक्षता र नेपाल कम्युनिस्ट पार्टी(माओवादी केन्द्र)का केन्द्रीय सदस्य एवम् लुम्बिनी प्रदेश सरकारका पूर्व अर्थमन्त्री कृष्णध्वज खड्काको प्रमुख आथित्यतामा सम्पन्न भएको हो ।

सम्मेलनमा बोल्दै खड्काले संविधान बनी महिलाहरूको अधिकार समावेश गरेकोमा महिलालाई स्थापित गर्न र अधिकारको प्रयोग गर्न महिलाहरू नै बढी चनाखो हुनुपर्नेमा जोड दिए । जनयुद्ध र जनआन्दोलनले महिला अधिकारका लागि सचेतीकरणमा अहम् भूमिका निर्वाह गरेपनि संविधान अनुसार कार्यान्वयनमा अझै समस्या देखिएको खड्काले बताए । ‘पछिल्ला घटनाक्रमले संविधानमा राखिएका अधिकारहरू खोसिने हुन् की भन्ने खतरा बढेको छ’ खड्काले भने । माओवादी केन्द्रका केन्द्रीय सदस्य सरस्वती न्यौपाने, लुम्बिनी प्रदेश समिति सदस्य प्रकाश अधिकारी लगायतका नेताहरूले महिलाहरूको अधिकार स्थापितमा माओवादी केन्द्र अग्रपङ्क्तिमा रहेको दाबी गरे ।