ब्यवसायिक रुपमा पशुपालन गरिरहेका हिमाल पोख्रेल मंगलबार चिन्तामा थिए । भर्खरै ब्याएको गाई एक्कासि ठलेपछि पोख्रेल परिबार पिरोलिएको थियो । दिसा–पिसाव नगर्ने र मुन्टो समेत उठाउन नसक्ने भएपछि चिन्तित बनेका उनिहरुले प्यूठान नगरपालिकाबाट पशु चिकित्सक सहितको टिम पुगेपछि केहि हलुका महसुस गरे ।

पशु चिकित्सक विष्णु केसी र पशुसेवा शाखा प्रमुख गिरिराज पौडेलले तत्काल उपचार सुरु गरे । गाईलाई मुख, सुई र स्लाइनबाट औषधि दिए । अढाई घण्टाको उपचारपछि सहारा दिएर गाई विस्तारै उभिन सक्ने भयो । जव गाई उभियो, केहि बेरअघिसम्म मलिन अनुहार भएका यज्ञमणी-हिमालका बुबा) मुसुक्क मुस्कुराउँदै भन्ने ‘अव त बाँच्छ होला।’

पशु चिकित्सक विष्णु केसी का अनुसार दुधमा क्यालेसियमको मात्रा अत्याधिक झरेपछि सरिरमा क्यालेसियम कम हुँदा मिल्क फिवर-सितांग ज्वरो)को समस्या देखिएको थियो । धेरै दुध दिने विकसित प्रजातिका गाई भैसिमा वेगौति दुधमा अत्याधिक क्यालेसियम झर्दा यो समस्या आउने उनले बताए ।

गाई विरामि परेपछि गोठमै डाक्टर पुगेर उपचार गरिदिएपछि यज्ञमणिले खुसी ब्यक्त गरे । गोठमै उपचार पाउँदा आफ्नो आस मारेको गाई बाँचेको उनको महसुस छ ।

प्यूठान नगरपालिकाले पशुपालक कृषकका पशुपन्छिमा आकस्मिक समस्या देखिए तत्काल फिल्डमै पुगेर सेवा दिदै आएको छ । केहि घण्टा ढिलो भएको भए मात्रैपनि उक्त गाईको ज्यान जोखिममा पर्ने शाखाप्रमुख पौडेलले बताए । कार्यालयका नियमित काम थाँती राखेर आकस्मिक उपचारमा निस्किएको उनको भनाई छ ।