कृषि तथा कृषिजन्य उत्पादनको विक्री तथा प्रदर्शनी प्यूठान महोत्सवमा भईरहेको छ ।

एकिकृत कृषि तथा पशुपन्छी विकास कार्यालय प्यूठानले कृषकहरुको उत्पादनलाई बृद्धि विकासमा टेवा पुगोस भन्नका लागि महोत्सवमा कृषि भेला प्रदर्शनी गरेको हो ।

कार्यालयले जिल्लाका विभिन्न स्थानमा उत्पादन भएका ७ बालिहरुको प्रदर्शनीलाई अगाडी सारेको कृषि अर्थविज्ञ उमेश चन्द श्रेष्ठले जानकारी दिए ।

कार्यालयले खाद्यान्न बाली, तरकारी बाली, फलफूल बाली, आलु बाली, नगदे तथा औद्योगिक बाली, माछा मासु र विविध गरी ७ बाली प्रदर्शनीको लागि लिएको श्रेष्ठले बताए ।

जिल्लाभरका ८८ जना कृषकले एक सय ४६ वटा कृषिजन्य बस्तुहरु प्रदर्शनका लागि लिएका छन् । प्रदर्शनीमा कृषकहरुलाई प्रोत्साहनका लागि पुरुस्कृत समेत गर्ने भएको छ ।

कार्यालयले क्रमश पहिलो, दोस्रो, तेस्रो र सान्त्वना हुनेलाई पुरुस्कृत गर्ने लक्ष्य लिएको कृषि अर्थविज्ञ श्रेष्ठले जानकारी दिए । त्यस्तै फागुन १०/११ गते किसानहरुको लागि माटो परिक्षण शिविर सञ्चालन हुने भएको छ ।

शिविरमा जाँच गराउनका लागि कृषकले आफ्नो बारी अथवा खेतको माटोको नमुना लिएर माटोको जाँच गराउन सकिने कार्यालयले जनाएको छ । माटोको नमुना संकलन भने ५०० ग्राम हुनुपर्ने बताइएको छ ।