२०८० असार ६अन्तर्राष्ट्रिय योग दिवस प्यूठानमा आज विभिन्न कार्यक्रम गरी मनाइएको छ । प्युठान आयुर्वेद स्वास्थ्य केन्द्र खलंगाको समन्वयमा जिल्लाका विभिन्न स्थानहरुमा योग गरी अन्तर्राष्ट्रिय योग दिवस मनाइएको हो । विभिन्न समुहका मानिसहरुको सहभागितामा मानवताका लागि योग भन्ने मुल नाराका साथ नवौ अन्तर्राष्ट्रिय योग दिवस मनाइएको हो । अन्तर्राष्ट्रिय योग दिवसको अवसरमा जिल्ला समन्वय समिति खलंगा, भानुभक्त मा वि बर्बाेट र माण्डवी गाउँपालिका लगायतका स्थानमा विभिन्न कार्यक्रम गरी मनाईएको हो ।
त्यस्तै प्यूठानको स्वर्गद्धारी नगरपालिका ५ सारीमा स्वर्गद्धारी नगरपालिका स्वास्थ्य आयुर्वेद शाखा प्यूठानको आयोजनामा कार्यक्रम गरिएको छ । स्वर्गद्धारी नगरपालिका ५ को भुबनोटमा पतञ्जली योग समितिका पदाधिकारी तथा योगकर्मीहरुको सहभागितामा कार्यक्रम गरिएको स्वर्गद्धारी नगरपालिका वडा नं ५ का वडा अध्यक्ष गिर बहादुर घर्ति मगरले जानकारी दिए । उनका अनुसार वडामा रहेका रोगी तथा निरोगीहरुका लागि निशुल्क रुपमा जीवनलाई स्वस्थ बनाउन सहयोग पुग्ने उद्देश्य सहित कार्यक्रम गरिएको हो । स्वास्थ्य उपचारको लागि लाखौ रुपैयाँ खर्च गर्नु भन्दा अगाडी स्वस्थ हुनलाई योगको आवश्यकता रहेकोले योग गर्न सबैलाई आग्रह गरेको उनले बताए ।
कार्यक्रममा “मेरो स्वास्थ्य, मेरो जिम्मेवारी, गरौं योग रहौ निरोग, घरघरमा योग परिवारको साथमा योग भन्ने प्लेकार्ड सहित ¥याली समेत गरिएको थियो । स्वर्गद्धारी नगरपालिका स्वास्थ्य आयुर्वेद शाखा प्यूठानका कविराज निरिक्षक ओविराम भण्डारीको अध्यक्षतामा भएको कार्यक्रममा प्रमुख अतिथि वडा अध्यक्ष गिर बहादुर घर्ति मगर रहेका थिए भने कार्यक्रममा अन्य स्थानीय लगायतको उपस्थित रहेको थियो ।
हरेक वर्ष जुन २१ तारिखका दिन विभिन्न जनचेतनामूलक कार्यक्रम आयोजना गरी अन्तर्राष्ट्रिय योग दिवस मनाइन्छ । संयुक्त राष्ट्रसंघको महासभाले सन् २०१४ मा गरेको निर्णयअनुसार सन् २०१५ जुन २१ देखि अन्तर्राष्ट्रिय योग दिवस मनाउन थालिएको हो । नेपालमा विसं २०३६ माघ १ गतेदेखि सूर्य उत्तरायण लाग्ने दिनको अवसर पारेर योग दिवस मनाउन थालिएको थियो। हाल नेपालमा माघ १ गते राष्ट्रिय र जुन २१ का दिन अन्तर्राष्ट्रिय योग दिवस मनाउने गरिन्छ ।
