हिन्दु धर्मावलम्बीहरूले बुधबार मुलुकभर श्रीकृष्ण जन्माष्टमी पर्व मनाएका छन् । श्रद्धालुहरू आफ्ना नजिकका कृष्ण मन्दिरहरूमा गई पूजा आराधना, व्रत र भजनकीर्तन गरेका छन् । प्यूठानमा पनि विभिन्न स्थानका मन्दिरहरुमा पूजा आरधना गरिएको छ ।

राधा कृष्ण मन्दिरहरुमा बिहानैदेखि श्रद्धालुहरूको भीड लागेको छ । भगवान् श्रीकृष्णको जन्म द्वापरयुगमा भाद्रकृष्ण अष्टमीको मध्यरातमा भएकाले आजको दिनलाई ‘श्रीकृष्ण जन्माष्टमी’ र रातलाई ‘मोहरात्री’ भनिन्छ । यस दिन कृष्ण मन्दिरमा भगवान् श्रीकृष्णको पूजा–आराधना, प्रवचन, भजनकीर्तन गर्नाका साथै विशेष गरी महिला, पुरुष ‘व्रत’ गरी रातभर जाग्राम बस्ने प्रचलन छ ।

प्यूठान नगरपालिका वडा नम्बर ४ टारीको राधा कृष्ण मन्दिरमा पूजा गर्नेहरुको भिड रहेको थियो । भगवान श्रीकृष्णको जन्मोत्सवका अवसरमा मन्दिरमा धेरै महिलाहरुले पुँजाआराधना गरेका छन् ।
मन्दिर स्थापना पछि २०६८ साल देखी राधाकृष्ण मन्दिरमा पुँजा गर्न सुरु गरिएको हो । दिनमा राधा कृष्णको पुँजाआजा गर्ने र साझमा भजनकिर्तन गर्ने गरेको राधा कृष्ण मन्दिर संरक्षण समितिका सदस्य निरज सुवेदीले बताए । उनका अनुसार विशेष ब्रतबन्धमा यस मन्दिरमा पुँजा गर्ने र विबाहको लागि समेत आउने गर्दछन् ।

त्यस्तै पुँजा गर्नको लागि मन्दिरमा पुग्नुभएकी स्थानीय सावित्रा पौडेलले मन शुद्ध हुने र खुसी प्राप्त हुने विश्वास लिई मन्दिरमा पुँजा गर्न पुगेको बताईन् । एकदिन खाली पेट ब्रत बस्दा स्वास्थ्यको लागि पनि आफुलाई फाईदा हुने उनि बताउछिन् ।

हिन्दु धर्मालम्बिहरुले विशेष आस्थाका रुपमा यस धर्मलाई मान्ने भएकाले कृष्ण भगवानको पुँजाआजा गरिएको स्थानीय जानकार गुरु प्रसाद पोख्रेलले बताए । महिला पुरुष दुबैले ब्रत बस्दै आएको उनको भनाई छ । साथै विभिन्न ब्रतबन्धका दिनमा पुँजाबाट उठेको भेटी अक्षकोषमा जम्मा हुने गरेको उनिहरुले बताएछन् ।