२०८० असोज ३०प्यूठान जिल्लामा सञ्चालित कापी उद्योगका सञ्चालकले जिल्लामा उत्पादन भएको कापीलाइ प्राथमिकता दिन ग्रहाकलाई आग्रह गरेका छन् । घरेलु तथा साना उद्योग कार्यालय प्यूठानका अनुसार जिल्लामा सञ्चालनमा आएको तीन वटा कापी उद्योग मध्ये हाल २ वटा उद्योग सञ्चालनमा छन् ।
प्यूठान नगरपालिका ४ बिजुवार स्थित स्वर्गद्धारी कापी उद्योगले विगत ९ बर्ष अघिदेखि उद्योग सञ्चालन गर्दै आएको छ । कापी उद्योगका सञ्चालक अष्कर भण्डारीका अनुसार उद्योग सञ्चालन गर्न ६५ लाख लगानी गरिएको थियो । सो लगानीको कारोबार हाल २ करोड भन्दा बढि भएको भण्डारीले बताए । उद्योगबाट बार्षिक ९ लाख रुपैयाँ आम्दानी गर्दै आएको भण्डारी बताउँछन् । स्वर्गद्धारी कापी उद्योगमा प्रत्यक्ष तर्फ ३ महिला र ७ पुरुष गरि १० जनाले रोजगारी पाएका छन् । स्वार्गद्धारी कापी उद्योगले छिमेकी जिल्ला रोल्पा र गुल्मीमा पनि निर्यात गर्ने गरेको छ ।
यस्तै प्यूठान नगरपालिका २ का सुवास खड्काले पनि कापी उद्योग सञ्चालन गर्दै आएका छन् । उनले ३० लाखको लगानीमा २०७३ चैत ६ गते उद्योग स्थापना गरेका हुन् । अहिले उद्योगबाट बार्षिक ५० लाखको कापी बिक्री हुँदै आएको सञ्चालक खड्काले बताए । खड्काको उद्योगमा अहिले २ जना पुरुषले रोजगार पाएका छन् । ६ जना सदस्य रहेको खड्का परिवार यहि उद्योगको कमाइले धानिएको छ ।
