२०८० कात्तिक १७तिहारको मुखमा किसानलाई यतिबेला गहुँ छर्ने चटारो परेको छ । प्यूठानको झिमरुक फाँट लगायतका स्थानमा गहुँ छर्न किसानलाई भ्याईनभ्याई छ । दशैको मुखका धान भित्राएका किसानलाई फेरि तिहार नजिकिदै गर्दा गहुँ छर्न व्यस्त देखिन्छन् । तर किसानलाई पहिले जस्तो ३/४ दिन भने लाग्दैन। पहिले गोरुले जोत्ने खेत अहिले थोरै समयमा एकैछिनमा मेसिन प्रयोग गरेर जोत्ने गर्छन्। प्रविधिको यूगमा प्रविधिले नै किसानलाई सहज बनाएको छ । पहिले खेतबारी जोत्न होस वा छर्न गोरु प्रयोग गर्ने गर्थे तर पछिल्लो समय भने किसानहरु प्रविधिको प्रयोग गरि ३/४ दिन लाग्ने काम अहिले केही छिनमै सक्काउने गरेका छन् । प्रविधिले छिटो सँगै फुर्सद तथा अन्य कामलाई पनि समयमा गर्न सक्ने समय मिलाएको छ । प्रविधिले काम गर्न सजिलो, छिटो गर्न र सुविधायूक्त बनाउँदा किसान पनि त्यसैमा मोहित भएका छन् ।
प्यूठान नगरपालिका –३ चक्रिबाङका शिब बहादुर कुमाल पहिले गोरुले खेत जोतेर गहुँ छर्थे । ३ रोपनीको जग्गामा गोरुले गहुँ छर्दा ४ देखि ५ दिन सम्म लगाउने गरेको शिब बहादुर बताउँछन् । तर अहिले ट्याक्टरको प्रयोग गरेर ५ दिन लाग्ने गहुँ छर्ने कामलाई ३० मिनेटमा सक्काउने गरेका छन् । पहिले समय धेरै लाग्थ्यो शिब बहादुरले भने,‘अहिले जिल्लामा प्रविधि भित्रिएपछि थोरै समयमा एउटा काम सक्काएर अरु काम गर्न पनि फुर्सद मिलेको छ ।’ उनले खेतमा गौतम जातको गहुँ लगाएका छन् ।
उनी मात्र होइन प्यूठान नगरपालिका –४ टारीकी सावित्रा नेपालीले पनि ट्याक्टरको प्रयोग गरेर नै गहुँ छरेकी छन् । उनको बारीमा पनि २ हल गोरुले २ दिन लगाउने गथ्र्यो । तर अहिले आधा घण्टामै उनलाई फुर्सद बनाएको छ । गोरुले गर्दा पहिले धेरै सयम लाग्नुको साथै दुःख समेत धेरै हुन्थ्यो साबित्राले भनिन्, ‘ट्याक्टरको सहायताले अहिले भने सजिलो गराएको छ ।, पहिलेको दिनमा धेरै ज्यालादारी लगाउनु पथ्र्यो, अहिले आफु एक्लै पनि गरिरहेको छु ।
ट्याक्टर साहुले ट्याक्टर प्रयोग गरेबापत किसानबाट एक मिनेटको ७० रुपैयाँ लिने गरेको छ । पहिले फाँटै भरी थरिथरीका गोरुहरु देखिन्थे तर अहिले फाँटमा फाट्टफुट्ट कहिकतै मात्र देखिने गरेका छन् ।
