प्युठान अस्पताल बिजुवारमा शल्यक्रिया मार्फत बच्चा जन्माउनेको संख्यामा बृद्धि भएको छ ।
चालु आर्थिक बर्षको साउनदेखि यता १ सय ५६ जनाको शल्यक्रिया मार्फत प्रसुती गराईएको अस्पतालले जनाएको छ। गत आर्थिक बर्षको तुलनामा चालु आर्थिक बर्षको मंसिर पहिलो हप्तासम्मको तथ्यांक अनुसार शल्यक्रिया मार्फत बच्चा जन्माउनेको संख्यामा वृद्धि भएको पाईएको हो ।

गत आर्थिक बर्षमा ३ सय १७ जनाको शल्यक्रियामार्फत बच्चा निकालिएको थियो।शल्यक्रियामार्फत बच्चा जन्माउनेहरुमा प्युठान नगरपालिकाको ४०,स्वर्गद्धारी नगरपालिकाको १८, नौवहिनी गाउँपालिकाको १४,झिमरुक गाउँपालिकाको १२, ऐरावती गाउँपालिकाको ११, मान्डवी गाउँपालिकाको ९, मल्लरानी गाउँपालिकाको ९ , गौमुखी गाउँपालिकाको ९, सरुमारानी गाउँपालिकाको ३ र रोल्पाका ३१ जना गरी १ सय ५६ जनाको अस्पतालबाट शल्यक्रिया मार्फत प्रसुती गराईएको हो।

जिल्लाका ९ वटै स्थानीय तह मध्ये प्युठान नगरपालिकाको सवैभन्दा बढि शल्यक्रिया मार्फत प्रसुति गराईएको प्युठान अस्पतालको शल्यक्रिया बिभागमा कार्यरत स्टाफ नर्स प्रतिक्षा न्यौपानेले बताइन । पाठेघर भन्दा बाहिर वच्चा रहेको एकजनाको शल्यक्रिया गरिएको छ ।
जिल्लामा बिशेषज्ञ सेवा सुचारु भए पश्चात बिरामीको संख्या ह्वात्तै वृद्धि भएको र जिल्ला बाहिर जानुपर्ने बाध्यतामा समेत कमी आएको अस्पतालले जनाएको छ । साथै पछिल्लो समय अस्पतालमा मातृ मृत्युको संख्या पनि सुन्य रहेको अस्पताल का मेडिकल सुपरिटेन्डेन्ट डा.प्रमिला खनालले बताईन ।