राष्ट्रिय प्रजातन्त्र पार्टी (राप्रपा) प्यूठानले ३०२ औं पृथ्वी जयन्ती तथा राष्ट्रिय एकता दिवस मनाएको छ । शुक्रबार राष्ट्रिय प्रजातन्त्र पार्टी (राप्रपा) जिल्ला कार्यसमिति प्यूठानले बिजुवारको मित्रमणी चोकबाट निकालेको र्‍याली जुम्रीमा पुगी पुन बिजुवारमा कोण सभा गरेको थियो ।

कार्यक्रममा प्रमुख अतिथि कृष्ण बहादुर खड्काले कुनै पनि पार्टीलाई गाली गरेर समस्याको समाधान गर्न नसकिने बताए । सबै मिलेर पृथ्वीनरायण शाहको सिद्धान्तलाई लिएर अन्य देशले प्रगति गरेको भन्दै नेपालका सबै व्यक्तीमा पृथ्वीनारायण शाहको सिद्धान्त अनुसरण गर्न आवश्यक रहेको बताए ।

कार्यक्रममा राष्ट्रिय प्रजातन्त्र पार्टी (राप्रपा) जिल्ला कार्यसमिति प्यूठानका अध्यक्ष चुमानसिंह बस्नेतले पृथ्वीनारायण शाहले बनाएको फूलजस्तो नेपाल अहिलेका घुसखोरीले सकाउन लागेको बताएका छन् । उनले राप्रपा पार्टी अरु भन्दा बेग्लै नीति लिएर आएको भन्दै देश तहसनहस बनाउन खोज्ने पाटीको विरोध गर्ने बताए । साथै राप्रपाले पुस र माघ महिनामा पार्टी संगठन तथा सुदृढीकरण अभियान सञ्चालन गर्ने र फागुनमा ७७ वटै जिल्लाका कार्यकर्ता काठ्माडौंमा भेला भएर शक्ति प्रदर्शन गर्ने समेत जानकारी गराए । पार्टी बलियो बनाउन पार्टी संगठन आवश्यक रहेको बताउँदै अध्यक्ष बस्नेतले पार्टी संगठनमा लाग्न कार्यकर्तालाई आग्रह पनि गरेका छन् ।

कार्यक्रममा बोल्ने वक्ताहरुले यस्तो दिवसलाई कुनै राजनितिक तवरले नभई सिंगो देशले यो कार्यक्रम गर्न आवश्यक रहेको बताएका थिए । साथै नेपाली भुमिको माया र चिन्ता लिने व्यक्तिले मात्र नेपालको माया चिन्न सक्ने बताए ।