२०८० फागुन २१नवनियुक्त ३ जना मन्त्रीले सोमबार पद तथा गोपनीयताको शपथ लिएका छन् । नेकपा माओवादी केन्द्रबाट हितबहादुर तामाङ, नेकपा एमालेबाट पदम गिरी र राष्ट्रिय स्वतन्त्र पार्टीबाट डीपी अर्यालले राष्ट्रपति रामचन्द्र पौडेलसँग मन्त्री पदको शपथ लिएका हुन् ।
तीनै जनाको मन्त्रालय भने अझै तोकिएको छैन । गृह मन्त्रालयमा एमाले र रास्वपा दुवैले दाबी गरेका छन् । यस्तै एमाले र माओवादीबीच केन्द्रदेखि प्रदेशसम्मका सरकारमा सहकार्य गरेर जाने सहमति भएको छ भने अब देखि केन्द्रसँगै विभिन्न प्रदेशमा पनि सरकार फेरिने सम्भावना समेत बढेको छ । केन्द्रमा भने आधा–आधा समय सरकारको नेतृत्व गर्ने एमाले र माओवादीले सहमति गरेका छन् ।
नेपाली कांग्रेस र माओवादी केन्द्रसहितको सत्ता गठबन्धन भत्किएपछि अहिलेको नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी र जनता समाजवादी पार्टी मिलेर नयाँ गठबन्धन बनेको हो ।
यस्तै नयाँ गठबन्धन बने पश्चात प्रधानमन्त्री पुष्पकमल दाहाल प्रचण्डले नेपाली कांग्रेसबाट बनेका सबै मन्त्रीलाई हटाएका छन् । प्रचण्डले सोमबार दिउँसो राष्ट्रपति रामचन्द्र पौडेललाई भेटेर नयाँ गठबन्धन बनाएको र मन्त्रीहरू हटाएको जानकारी दिएका हुन् ।
