२०८१ जेष्ठ २५मल्लरानी गाउँपालिका पूर्ण खोप सुनिश्चितता पालिका घोषणा भएको छ । शुक्रबार एक कार्यक्रमको आयोजना गरी राष्ट्रिय खोप तालिका अनुसार बालबालिकाले लगाउनुपर्ने सबै खोप लगाईसकेपछि पालिकालाई पूर्ण खोप सुनिश्चितता घोषणा गरिएको हो ।
जन्मेदेखि १५ महिनासम्मका २ सय ९३ बालबालिका र १६ देखि ५९ महिनाका ९ सय ४ जना बालबालिकाले खोप लगाएको गाउँपालिकाले जनाएको छ । १६ देखि ५९ महिनासम्मका ८ सय ४ जना बालबालिकाले पूर्णखोप लगाएका छन् भने बाँकीलाई सर्वेक्षणको क्रममा खोप लगाई पुरा गरिएको मल्लरानी गाउँपालिकाका स्वास्थ्य शाखाका प्रमुख पारस शाहीले जानकारी दिए ।
गाउँपालिका अध्यक्ष कृष्ण बहादुर खड्काको अध्यक्षतामा भएको कार्यक्रमको प्रमुख अतिथि जिल्ला समन्वय समिति प्यूठानका प्रमुख धरम बहादुर जि.सी र विशेष अतिथि स्वास्थ्य कार्यालय प्यूठानका प्रमुख हेमराज पाण्डे रहेका थिए । कार्यक्रममा पालिका भित्रका ५ वटै वडाका खोप कार्यकर्तालाई प्रमाणपत्रले सम्मान समेत गरिएको थियो ।
