झिमरुक गाउँपालिकामा मेलमिलापकर्ताहरुका लागि मेलमिलाप सम्बन्धि पुर्नताजगी तालिम सम्पन्न भएको छ । “दिगो शान्तिका लागि उन्नत मेलमिलाप” भन्ने नारासहित २७ गतेदेखि सुरु भएको तालिम ३ दिनसम्म सञ्चालन भएको गाउँपालिकाले जनाएको छ ।

न्यायिक समितिमा आएका मुद्धाहरुलाई वडा तहमा नै निरुपण गर्ने उद्देश्य सहित तालिमको आयोजना गरिएको झिमरुक गाउँपालिका न्यायिक समिति संयोजक तथा गाउँपालिकाका उपाध्यक्ष प्रमोद पोख्रेलले जानकारी दिए । गाउँपालिकामा आएका सबै मुद्धाहरुलाई मेलमिलापकर्ताहरुले आचार संहिताको नियम पालना गरी सबैको मुद्धालाई साझा धारणाले निरुपण गर्न समिति संयोजक पोख्रेलले निर्देशन समेत दिएका छन् ।

तालिमको प्रशिक्षकमा अधिवक्ता नविन घिमिरे, प्यूठान जिल्ला न्यायधिश पुनाराम खनाल, जिल्ला अदालतका श्रेस्तेदार गोपाल गौतम, सरकारी वकिल कार्यालय दाङ घोराहीका लक्ष्मी न्यौपाने रहेका थिए ।

न्यायिक समिति संयोजक प्रमोद पोख्रेलको अध्यक्षतामा भएको तालिमको प्रमुख अतिथि गाउँपालिका अध्यक्ष पित बहादुर महतरा क्षेत्री र विशेष अतिथि प्रमुख प्रशासकीय अधिकृत पवन कुमार शाही रहेका थिए ।

झिमरुक गाउँपालिकाको आयोजनामा भएको तालिमको सहजिकरण शान्तिका लागि सहकार्य संस्था नेपालले गरेको थियो ।