प्यूठान नगरपालिका ३ मा पशु स्वास्थ्य शिविर सम्पन्न भएको छ । आइतबार प्यूठान नगरपाकिलाको पशु सेवा शाखाको आयोजनामा भएको शिविरबाट ८४ जना कृषकले सेवा लिएका छन् । प्यूठान नगरपालिका ३ ओखरबोटमा भएको कार्यक्रममा मान्द्रेचौर, घुर्चौने लगायतका स्थानीयले सेवा लिएको ३ नं वडा सचिव ध्वज बहादुर के.सी ले जानकारी दिए । उनका अनुसार ३ वटा पाठालाई खसी बनाईएको छ भने गाई, भैंसी र बाख्रालाई जुका र उपियाको औषधी, भिटामिन, क्याप्सुल लगायतका औषधी वितरण गरिएको छ ।

यस्तै पशु सेवा शाखाले वडा नं १ धाइरेचौरमा पनि हिजो शनिबार पशु स्वास्थ्य शिविर सञ्चालन गरेको थियो । कार्यक्रममा पशु स्वास्थ्य परिक्षण, उपचार सेवा, आन्तरिक तथा बाह्य परजीवी नियन्त्रण, पशु बन्ध्याकरण सेवा, रेविज खोप र अन्य प्राविधिक सेवा दिइएको प्यूठान नगरपालिका पशु सेवा शाखाले जनाएको छ ।

शिविरमा सहभागि कृषकहरुले रोगका बारेमा जानकारी नहुँदा पशुहरुमा लाग्ने रोगले कृषकलाई सताएको भन्दै यी कार्यक्रम हाम्रो लागि महत्वपूर्ण भएको बताएका थिए । ग्रामिण भागमा बसोबास गर्ने हामीजस्ता कृषकहरुका लागि यो कार्यक्रम अत्यन्तै आवश्यक हुने भन्दै यस्ता कार्यक्रमलाई स्थानीय सरकारले निरन्तरता दिन समेत सुझाब दिएका छन् ।

वडा सचिव ध्वज बहादुर के.सीको अध्यक्षतामा भएको कार्यक्रममा प्यूठान नगरपालिकाका पशु स्वास्थ्य शाखा अधिकृत माधवा रिजाल, वडा नं ५ जुर्मिकाँडाकी बिजया श्रेष्ठको सहभागिता थियो ।