प्यूठान जिल्लामा केहिदिन देखि लगातार परेको अविरल वर्षाका कारण प्युठानको ग्रामीण तथा सहरी क्षेत्रको जनजीवन अस्तब्यस्त भएको छ । प्यूठान जिल्लाको दुर्गम क्षेत्र मानिने प्युठान नगरपालिका ५ चान्जामा पहिरो जाँदा त्यस क्षेत्रका आसपासका बस्तीहरु उच्च जोखिममा परेका छन् ।

अविरल बर्षातका कारण चान्जामा रहेको एक सामुदायिक बिद्यालय पहिरोले भत्किएको प्यूठान नगरपालिका ५ का निर्वतमान वडा अध्यक्ष लक्ष्मण भण्डारी बताए ।त्यस्तै प्युठान नगरपालिका –५ जुम्रिकाँढा जाने मोटर बाटो पहिरोको कारण अवरुद्ध हुँदा आवतजावत ठप्प छ । प्युठान नगरपालिका– ६ माझकोटको ग्रामीण ठाँउ जाने मोटर बाटो पनि विभिन्न ठाउँहरुमा पहिरो जाँदा अवरुद्ध भएको छ ।

प्यूठान नगरपालिका –६ आमधारा निवासी छविलाल बुढा मगरको गोठ भत्किँदा पशु चौपायाहरू घाइते भएका छन । जिल्लाका ग्रामीण क्षेत्रका सडकहरु अवरुद्ध हुँदा आवतजावतमा समस्या आएकोे छ । स्थानीयलाइ अस्पताल पुग्न, उपभोग्य सामानका लागि सवारी नचल्दा समस्या छ ।

जिल्ला प्रवेश गर्ने मुख्यद्धार प्यूठान भालुवाङ सडक खण्ड केहि दिन देखि आवतजावत गर्न समस्या भइरहेको छ । गनाहा –चकचके सडक खण्ड मोतिपुर र गर्जेनी स्थित पहिरो र लेदो झरेर सडक दिनहु समस्या भइरहने सडक डिभिजन कार्यालय प्यूठानका प्रमुख राजिव श्रेष्ठले बताए ।

त्यस्तै देवीस्थान तिराम दाङ सडक पनि अवरुद्ध भएको र खुलाउने प्रयास जारी रहेको छ । केहि समय बाटो सुचारु भएता पनि विभिन्न ठाउँहरूमा खसेको पहिरो र लेदोका कारण यात्रुहरूलाई आवत जावतमा कठिनाइ भएको सडक डिभिजन कार्यालय प्यूठानले जनाएको छ ।