नेकपा (एमाले) प्यूठान अन्तरगत पालिका कमिटीहरूको अधिवेशनको सरगर्मी बढेको छ ।

मङ्सिर ८ गतेदेखि १५ गतेसम्म नेकपा एमाले प्यूठानको पालिका अधिवेशन सम्पन्न गर्ने गरी मिति तय भएको नेकपा (एमाले) प्यूठानले जनाएको छ ।

प्यूठान जिल्लाका ९ वटा स्थानीय तह मध्य झिमरुकमा ८ ,सरुमारानी १० , माण्डवीमा १२ , गौमुखीमा १३ , नौबहिनीमा १४ , मल्लरानीमा ११ र स्वर्गद्वारी नगरपालिकाको मङ्सिर १५ गते अधिवेशनको मिति तय भएको नेकपा एमाले प्युठान प्रचार विभाग प्रमुख इश्वरा आचार्यले बताइन । प्यूठान नगरपालिकाको यसअघि नै अधिवेशन सम्पन्न भएको थियो । ऐरावती गाउँपालिकाको मिति तय भई नसकेको आचार्यले बताइन । एमाले प्युठानका अनुसार वडा अधिवेशनहरू धमाधम भइरहेका छन् । जिल्लाका ६४ वटा वडा मध्य शुक्रवार सम्म ४५ वटा वडाहरूमा अधिवेशन सम्पन्न भएको एमाले प्युठान ले जनाएको छ ।

प्रचार विभागको शुक्रवार बसेको बैठकले पालिका अधिवेशनको प्रचार प्रसारलाई तीव्रता दिने निर्णय गरेको एमाले प्रचार विभाग ले जनाएको छ । जिल्ला कमिटी प्यूठानका अध्यक्ष विजय बिराज विष्टको प्रमुख आतिथ्यतामा बसेको विभागको बैठकले अधिवेशनका गतिविधिलाई व्यापक रूपमा प्रचार प्रसार गर्ने निर्णय गरेको हो ।